SALMOS 88:6-18

⁶Ta techmajcajtoc ipan nopa ostot cati más huejcata campa onca tzintayohuilot cati más yayahuic.

⁷Mocualancayo nechtaijyohuiltía chicahuac huan talojtzitzi nechtatzintanhuetziltía más.

⁸Tijchijtoc para noteixmatcahua ma nechtahuelcahuaca huan ma nechijiyaca. Eltoc quej niitztoc ipan se tatzacti huan amo hueli niquisa.

⁹Ayecmo hueli nitachiya pampa tahuel nimochoquilijtoc. Mojmosta nimitztajtanía motapalehuil, huan nimomatanana quema nimotatajtía ica ta, TOTECO, para techtasojta.

¹⁰Pero nijmachilía para, quena, nimiquis nimantzi, huan ¿taya ipati elis para na nopa tiochicahualnescayot cati tijchihuas quema ya nimictoc? ¡Amo teno! ¿Huelis nimitzpaquilismacas quema ya nimictos?

¹¹Se mijcatzi cati ya quitalpachojtoque amo huelis tepohuilis para tijpiya hueyi taicnelili. Amo huelis tepohuilis para titemachti.

¹²Nepa campa tzintayohua amo huelise tepohuilise nopa huejhueyi tiochicahualnescayot cati tijchihua. Mijcatzitzi itztoque ipan se tali campa ayecmo teno quielnamiquij, huan amo huelis mitzelnamiquise para san ta tixitahuac.

¹³Pero na nimitztzajtzilijtoc ta TOTECO, huan sese ijnaloc nochi cati niquijtohua quema nimotatajtía ica ta ajsi hasta moixpa.

¹⁴TOTECO, ¿para ten tijhuejcamajcajtoc nonemilis? ¿Para ten tiquijcuenía moxayac huan titachiya sejcoyoc?

¹⁵Na niitztoc ipan taijyohuili huan tequipacholi hasta quema noja niitztoya nitelpocat. Majmajti huan miquilisti cati ta techtitanilijtoc nechtoquilijtinemi, huan ama ayecmo nihueli más niquijyohuía.

¹⁶Miyac huelta hualajtoc ipan na mohueyi cualancayo, huan nopa majmajti cati techtitanilijtoc tahuel nechtaijyohuiltía.

¹⁷Quena, nochi nopa tamanti nechyahualojtoc quej at.

¹⁸Nochi cati niquinicnelía huan cati eliyayaj nohuampoyohua tiquinchijtoc ma nechtahuelcahuaca, ayecmo nechchihuilíaj cuenta. Huan noteixmatcahua tiquintalijtoc ipan tzintayohuilot.