Salmos 88:1-17

¹Corëpita mirajcuna isquirbishan alabansa. Salbamaj Tayta Dios, chacaypa junajpapis gamtami mañacaycämö yanapämänayquipaj.

²¡Mañacamushäta wiyaycamay ari! ¡Ruwacamushätapis wiyaycamuy ari!

³Fiyupa mana allimanmi chayashcä. Wañunäpänami caycäpis.

⁴Nogapäga wañushapänönami yarparcaycanpis. Pasaypa callpaynajnami ricacushcä.

⁵Wañushanönami caycäpis. Wañojcunata pampashannönami caycä. Gam manana yanapashayquinömi caycä. Gongaycushayqui runacunanönami caycä.

⁶Nogataga jitarpamashcanqui mas rurinnin uchcumanmi, ruri fiyupa chacajninmanmi.

⁷Rabyashayquitami nogacho päsacächishcanqui. Chayasha mayu cuchpayllapa aywar ñiticurcojnömi ruraramashcanqui. Selah

⁸Gammi camacächishcanqui amïgöcunapis jaguiycamänanpaj. Gammi camacächishcanqui paycuna manana awantamänanpaj. Cananga caycä prësu mana gueshpiyta puydejnömi.

⁹Wagaycällarnami gaprayaycäpis. Tayta Dios, waran-waranmi maquëtapis chojpacur gamllaman mañacaycämö.

¹⁰¿Wañojcunaga ricangachuraj milagruta rurashayquita? ¿Wañojcunaga agradësicushunquimanchuraj? Selah

¹¹¿Sepultürachöga cuyacoj cashayquita willanacunmanchuraj? ¿Wanwanyaycaj uchcuchöga alli cashayquita willanacunmanchuraj?

¹²¿Fiyupa yanauyaycaj chacaycho musyanmanchuraj milagrucunata rurashayquita? ¿Allicunata rurashayquita yarpanmanchuraj imatapis manana yarpäna pachachöga?

¹³Nogami ichanga Tayta Dios gamllata gayacaycämö. Tutallanami gamta mañacaycämö.

¹⁴Tayta Dios nogataga ¿imanirtaj manacajman churamanqui? ¿Imanirtaj nogapitaga pacacunqui?

¹⁵Wamra cashäpita-pachami nogaga fiyupa llaquicullar goyashcä. Wañuyllami tumapämasha. Fiyupa manchariypajcunawanmi ñacachimashcanqui.

¹⁶Rabyawan ñacachimashayquimi nogataga chayamasha. Ñacachimaptiquimi ima ruraytapis mana camäpacönachu.

¹⁷Ñacaymi imay örapis tumapaycäman aypalla yacu jundir ñitiycämajno.