SALMOS 86:4-17

⁴Toteco, xinechmaca paquilistli pampa na san ta nimitzhueyichihua.

⁵Toteco, ta nelía ticuali huan timoquetztoc timocualtlalijtoc para titetlapojpolhuis. Tiquinicnelía huan nimantzi tiquintlasojtla nochi tlen mitztlajtlaníaj motlapalehuil.

⁶TOTECO, xinechtlacaquili quema nimomaijtohua. Quena, xinechtlacaquili quema nimitztzajtzilía.

⁷Nimitztzajtzilis ipan nopa tonali quema nechajsis tlaohuijcayotl, pampa san ta tinechnanquilía huan tinechpalehuía.

⁸Ipan nochi sequinoc tlen quintocaxtíaj “dioses”, ax onca seyoc queja ta, Toteco. Huan axaca hueli quichihua huejhueyi tlamantli queja ta tijchihua.

⁹Elqui ta tlen tiquinchijchijqui nochi tlaltini ica inintlacajhua. Yeca hualase huan mitzhueyichihuase, Toteco. Huan mitzhueyitlalise ta tlen titlatzejtzeloltic,

¹⁰pampa ta tlahuel tihueyi huan tijchihua huejhueyi tlamantli. ¡San ta nelía tiDios!

¹¹TOTECO, xinechnextili moojhui huan nijtoquilis pampa san ya nopa temachtli. Xijchihua para noyolo ma mitzhueyitlepanita, huan ma quiimacasis mitzixpanos nochi noyolis.

¹²TOTECO Dios, nimitzpaquilismacas ica nochi noyolo huan nimitzhueyitlalis para nochipa,

¹³pampa tlahuel hueyi moteicnelilis noca na, huan ax quema tlami. Ta tinechmanahuijtoc para ax niyas mictla campa tlanahuatía miquistli.

¹⁴Toteco Dios, miyac tlacame tlen mohueyimatij huan tlen mosisiníaj motlanantoque para nechtehuise. Huan miyac tlatehuijca tlacame huan tlaixpanoni quinequij nechmictise, huan ax moyolilhuíaj tlen ta.

¹⁵Pero ta Toteco nelía titetlasojtla huan hueyi moyolo. Ax nimantzi ticualani. San ta titeicnelía huan san ta timelahuac.

¹⁶Xinechtlachili ica miyac teicnelijcayotl huan xinechmaca chicahualistli na nimotlatequipanojca. Huan xijmanahui icone mosihua tlatequipanojca.

¹⁷Xijnexti se tlanextili para ta tinechcualita. Queja nopa quiitase nocualancaitacahua, huan mopinahuase pampa momacase cuenta para ta, TOTECO, tlahuel tinechpalehuía huan tinechyoltlalía.