6Nopa masehualme elque iixhuihua Edom, Ismael, Agar huan Moab.
7Nojquiya inijuanti hualajque ten nopa talme Gebal, Amón, Amalec, Filistea huan Tiro.
8Huan nopa masehualme ten tali Asiria nojquiya mosejcotilijque inihuaya. Nojquiya iixhuihua Lot.
9Xiquinchihuili san se quej tiquinchihuili tali Madián ehuani, o quej tijchihuili Sísara huan Jabín ehuani ipan hueyat Cisón.
10O xiquinchihuili quej tijchijqui ica mocualancaitacahua ipan tali Endor. Inijuanti inintacayohua mocajque tepejtoque talchi huan elque quej abono para tali.
11Xijchihua para nopa tacame cati tahuel tejtetique ma miquica quej Oreb huan Zeeb quinmictijque. Huan nojquiya xijchihua para inintayacancahua ma miquica quej nopa tanahuatiani Zeba huan Zalmuna.
12Pampa inijuanti quiijtojque: “Ma timoaxcatica nopa tali cati iaxca Dios.”
13NoTeco Dios, xiquinsemana ica moijyoyo quej elisquíaj taltepocti, o quej tasoli cati quihuica ajacat,
14o quej se hueyi tit cati quitamitatía se cuatitamit.
15Xiquinquixti ica huejhueyi tit, ica tatomonilot, huan ica huejhueyi ajcomalacat.