SALMOS 83:3-15

³Inijuanti tlahuel quimatij quenicatza quitlalise tlaquetztli ica momasehualhua. Huan quisencahuaj quenicatza quichihuase para quinmictise catli tiquintlapejpenijtoc.

⁴Huan quiijtohuaj: “Ma tiyaca tiquinixpolotij nochi nopa israelitame para ayacmo ma elica se tlali ica imasehualhua. Huan ayacmo aqui quielnamiquis itoca Israel.”

⁵Ya nopa catli quisencajque san sejco quema mosentilijque para mocamanalhuise. Quena, san sejco quichijque se camanali para fiero mitzchihuilise.

⁶Nopa masehualme elque iixhuihua Edom, Ismael, Agar huan Moab.

⁷Nojquiya inijuanti hualajque tlen nopa tlalme Gebal, Amón, Amalec, Filistea huan Tiro.

⁸Huan nopa masehualme tlen tlali Asiria nojquiya mosansejcotilijque ininhuaya. Nojquiya iixhuihua Lot.

⁹Xiquinchihuili san se quen tiquinchihuili tlali Madián ehuani, o quen tijchihuili Sísara huan Jabín ehuani ipan hueyatl Cisón.

¹⁰O xiquinchihuili quen tijchijqui ica mocualancaitacahua ipan tlali Endor. Inijuanti inintlacayohua mocajque tepejtoque tlalchi huan elque quen abono para tlali.

¹¹Xijchihua para nopa tlacame catli tlahuel tejtetique ma miquica quen Oreb huan Zeeb quinmictijque. Huan nojquiya xijchihua para inintlayacancahua ma miquica quen nopa tlanahuatiani Zeba huan Zalmuna.

¹²Pampa inijuanti quiijtojque: “Ma timoaxcatica nopa tlali catli iaxca Dios.”

¹³NoTeco Dios, xiquinsemana ica moijiyo quen inijuanti elisquíaj tlaltejpoctli, o quen tlasoli catli quihuica ajacatl,

¹⁴o quen se hueyi tlitl catli quitlamitlatía ipan se cuatitlamitl.

¹⁵Xiquintojtoca ica huejhueyi tlitl, ica tlatomonilotl, huan ica huejhueyi ajcomalacatl.