SALMOS 81:9-16

⁹Amo quema xijhueyichihuaca seyoc cati quitocaxtíaj ‘dios’. Yon amo xiquinpiyaca taixcopincayome ipan amocalijtic.

¹⁰Pampa elqui na, niamoTECO huan niamoDios, cati nimechquixti ipan tali Egipto. Xijtapoca amocamac huan anquiitase sinta amo nimechixhuitis. Quena, anquiselise nochi tamanti tatiochihualisti cati amechpolohua.

¹¹¡Pero amo! Nomasehualhua amo quinejque nechtacaquilise. Israelitame amo quinejque ma niitzto tatajco inijuanti.

¹²Yeca niquintahuelcajqui para ma huihuitiyaca huan ma elica quej popoyotzitzi. Huan niquincahuili ma quichihuaca cati inijuanti quinequiyayaj.

¹³Pero sinta noisraelita masehualhua nechtacaquilijtosquíaj huan quitoquilijtosquíaj noojhui,

¹⁴huajca na san ipan se talojtzi niquinechcapantalijtosquía inincualancaitacahua huan niquintzontamiltijtosquía.”

¹⁵Quena, nochi cati quicualancaitaj TOTECO, nimantzi moechcapanojtosquíaj iixpa. Huan itztosquíaj ipan tatzacuiltili para nochipa.

¹⁶Pero Toteco Dios amechtamacasquía ica tacualisti cati más cuali. Huan amechmacasquía sayolnecti huan nochi cati más anquinequij para amechixhuitisquía.