SALMOS 81:4-15

⁴pampa Toteco Dios catli eli iTeco tohuejcapan tata Israel techmacatoc nopa tonalme para ma tipaquica miyac. Huan nojquiya eltoc ijcuilijtoc ipan itlanahuatilhua para ma tijchihuaca.

⁵Huan techmacac para ma tiquelnamiquica catli quichijqui ica José, huan quenicatza mohuilanqui ininhuaya nopa masehualme tlen tlali Egipto, campa titetequipanojque san tlapic. Nijcajqui camanaltic se catli amo niquiximatqui huan quiijto:

⁶“Ama nimechquixtilis nopa tlamamali catli anquihuicaj amoajcolpa, huan ayacmo anquitlananase ica amomax tlamantli catli tlahuel etic.”

⁷Nojquiya quiijto: “Amojuanti antechtzajtzilijque quema anitztoyaj ipan tlaohuijcayotl huan na nimechmaquixti. Nimechnanquili hasta tlen nepa tepetl Sion campa motlatía nopa tlatomonilotl. Nojquiya ipan tlali Meriba nimechyejyecoli amotlaneltoquilis quema anmotequipachohuayayaj pampa amo oncayaya atl.

⁸Yeca annoisraelita masehualhua, techtlacaquilica quema chicahuac nimechtlacahualtía.

⁹Amo quema xijhueyichihuaca seyoc catli quitocaxtíaj ‘dios’. Niyon amo xiquinpiyaca tlaixcopincayome ipan amocalijtic.

¹⁰Pampa elqui na, niamoTECO huan amoDios, catli nimechquixti ipan tlali Egipto. Xijtlapoca amocamac huan anquiitase sintla amo nimechixhuitis. Quena, anquiselise nochi tlamantli tlatiochihualistli catli anmechpolohua.

¹¹¡Pero amo! Nomasehualhua amo quinejque nechtlacaquilise. Israelitame amo quinejque ma niitzto tlatlajco inijuanti.

¹²Yeca niquintlahuelcajqui para ma huihuitiyaca huan ma elica quen popoyotzitzi. Huan niquincahuili ma quichihuaca catli inijuanti quinequiyayaj.

¹³Pero sintla noisraelita masehualhua nechtlacaquilijtosquíaj huan quitoquilijtosquíaj noojhui,

¹⁴huajca na san ipan se tlatoctzi niquinechcapantlalijtosquía inincualancaitacahua huan niquintzontlamiltijtosquía.”

¹⁵Quena, nochi catli quicualancaitaj TOTECO, nimantzi moechcapanojtosquíaj iixpa. Huan itztosquíaj ipan tlatzacuiltili para nochipa.