SALMOS 81:3-15

³Ma tijpitzaca tlapitzali quema yancuic metztli, quema temitoc metztli, huan ipan sequinoc tonali quema tiilhuichihuaj,

⁴pampa Toteco Dios tlen eli iTeco tohuejcapan tata Israel techmacatoc nopa tonali para ma tipaquica miyac. Huan nojquiya eltoc ijcuilijtoc ipan itlanahuatilhua para ma tijchihuaca.

⁵Huan techmacac para ma tiquilnamiquica tlen quichijqui ica José, huan quejatza motehuijqui ininhuaya nopa tlacame tlen tlali Egipto, campa titlatequipanojque san tlapic. Nijcajqui camatqui se tlen ax niquixmatqui huan quiijto:

⁶“Ama nimechquixtilis nopa tlamamali tlen inquihuicaj imoajcolpa, huan ayoc inquitlalanase ica imoma tlamantli tlen tlahuel etic.”

⁷Nojquiya quiijto: “Imojuanti innechtzajtzilijque quema initztoyaj ipan tlaohuijcayotl huan na nimechmaquixti. Nimechnanquili hasta tlen nepa tepetl Sion campa motlatía nopa tlatomonilotl. Nojquiya ipan tlali Meriba nimechyejyecohuili imotlaneltoquilis quema inmocuesohuayayaj pampa ax oncayaya atl.

⁸Yeca innoisraelita tlacajhua, xinechtlacaquilica quema chicahuac nimechtlacahualtía.

⁹Ax quema xijhueyichihuaca seyoc tlen quitocaxtíaj ‘dios’. Niyon amo xiquinpiyaca tlaixcopincayome ipan imocalijtic.

¹⁰Pampa elqui na, niIMOTECO huan imoDios, tlen nimechquixti ipan tlali Egipto. Xijtlapoca imocamac huan inquiitase intla ax nimechixhuitis. Quena, inquiselise nochi tlamantli tlatiochihualistli tlen inmechpolohua.

¹¹¡Pero axtle! Notlacajhua ax quinejque nechtlacaquilise. Israelitame ax quinejque ma niitzto tlatlajco inijuanti.

¹²Yeca niquintlahuelcajqui para ma huihuitiyaca huan ma elica queja popoyotzitzi. Huan niquincahuili ma quichihuaca tlen inijuanti quinequiyayaj.

¹³Pero intla noisraelita tlacajhua nechtlacaquilijtosquíaj huan quitoquilijtosquíaj noojhui,

¹⁴huajca na san ipan se tlalochtli niquinicnotlalijtosquía inincualancaitacahua huan niquintzontlamiltijtosquía.”

¹⁵Quena, nochi tlen quicocolíaj TOTECO, nimantzi moechcapanojtosquíaj iixtla. Huan itztosquíaj ipan tlatzacuiltili para nochipa.