Salmos 81:1-12

¹Asaf isquirbishan alabansa. ¡Tayta Diostaga cushisha alabay! Paymi ima-aycapitapis chapämanchi. ¡Cushisha alabay Jacobpa Tayta Diosnintaga!

²Panderëtacuna, arpacuna, arpa-mallwacuna wagashan-tupu cantay.

³Trompëtacunata tucay llullu quilla fistacho, llëna quilla fistacho. Chay junajcunami noganchïpäga jatun fistanchi.

⁴Noganchi Israelcunataga chayno ruranapämi Tayta Diosninchi nimaranchi.

⁵Egiptupita shacamuptinmi Josëpita mirajcunawan Tayta Diosga chayno conträtutami ruraran. Mana rejsishä rimaycho cayno nimojtami wiyashcä:

⁶«Lasajta apariraycashayquitami jorgushcä. Fiyupa sasa aruycunacho caycajtami jamachishcä.

⁷Fiyupa llaquicur mañacamaptiquimi nogaga salbarä. Pucutay rurincho räyuycajpitami gamcunataga willapämurä. Imano yäracaycämashayquitapis Meriba yacu ñaupanchömi gamcunataga musyaparä. Selah

⁸Acrashä runacuna, willapashäta sumaj wiyacuy. ¡Israel runacuna, alliraj canman wiyacamaptiquega!

⁹Juc-läcunapa diosnintaga ama charaychu. Juc dioscunataga ama aduraychu.

¹⁰Nogami Egipto nasyunpita jorgamoj Tayta Diosniqui cä. Nogami imapis pishëpacushayquitaga puchu-puchu tarichishayqui.

¹¹«Ichanga acrashä runacuna caycar manami wiyacamashcanquichu. Israelcuna manami wiyacamashcanquichu.

¹²Chaypitami cachaycushcä munashayquino cawacunayquipaj. Chaymi munashayquinöna goyäcushcanqui.