SALMOS 80:5-16

⁵Techmacatoc ma tijcuaca pantzi ica choquisti, huan ma tiquica toixayo.

⁶Tijcajtoc ma techpinahualtica nopa talme cati techyahualohuaj huan ma techhuetzquilica tocualancaitacahua.

⁷Toteco Dios, ta tiDios Cati Tijpiya Nochi Chicahualisti, xijchihua ma timocuepaca ica ta. Techtachili ica moxayac cati senpactoc. Techicneli huan techmaquixti.

⁸Techhualicac ten tali Egipto quej tielisquíaj se xocomeca tzonti cati selic. Tiquinquixti nopa sequinoc masehualme cati amo mitzixmatque huan nopona techtojqui.

⁹Tijcualtali nopa tali huan elqui quej tijpixque miyac tonelhuayohua. Huan tijtemitijque nopa tali.

¹⁰Nopa tepeme tiquintamitzajque ica toecahuil. Huan tielque quej tiocuame cati huejcapantique cati moaxcahua, Toteco.

¹¹Tichamanque huan moscaltijque tomacuayohua. Huan toecahuil tiisraelitame ajsic hasta campa nopa hueyi at cati itoca Mediterráneo huan hasta campa nopa hueyat Éufrates.

¹²Huajca ¿para ten ayecmo techmocuitahuía? Eltoc quej tijtamisosolo itepanyo moxocomeca mil huan tijcahua ma quitamicuaca nochi ojpayani.

¹³Inijuanti itztoque quej cuapitzome cati hualahuij huan tapoxoníaj yahualtic ten tojuanti, huan eltoc quej nopa tecuanime ya techtamicuaj.

¹⁴Yeca Toteco Dios Cati Tijpiya Nochi Chicahualisti timitztajtaníaj, ximocuepa huan techtiochihua. Techhualtachili ten nopona ilhuicac, xiquita quenicatza tiitztoque huan xijmocuitahui ni moxocomecamil.

¹⁵Quena, xijmocuitahui cati ta tijtojqui huan nopa ichamanca cati cuali tijtatzquiltijtoc.

¹⁶Pampa tocualancaitacahua techhuejhuelojtoque huan techtatijtoque. ¡Xiquintzontamilti ica mohueyi cualancayo!