SALMOS 80:4-13

⁴TOTECO, ta tiDios Catli Tijpiya Nochi Chicahualistli, ¿hasta quema tlamis ticualantoc ica tojuanti huan amo tijtlacaquilis quema timotlatlajtíaj?

⁵Techmacatoc ma tijcuaca pantzi ica choquistli, huan ma tiquijica toixayo.

⁶Tijcajtoc ma techpinahualtica nopa tlalme catli techyahualohuaj huan ma techhuetzquilica tocualancaitacahua.

⁷Toteco Dios, ta tiDios Catli Tijpiya Nochi Chicahualistli, xijchihua ma timocuepaca ica ta. Techtlachili ica moixayac catli senpactoc. Techicneli huan techmaquixti.

⁸Techhualicac tlen tlali Egipto quen tieltosquíaj se xocomeca tzontli catli selic. Tiquintojtocac nopa sequinoc masehualme catli amo mitziximatque huan nopona techtojqui.

⁹Tijcualtlali nopa tlali huan elque quen tijpixque miyac tonelhuayohua. Huan tijtemitijque nopa tlali.

¹⁰Nopa tepeme tiquintlamitzajque ica toecahuil. Huan tielque quen tiocuame catli huejcapantique catli moaxcahua, Toteco.

¹¹Tichamanque huan moscaltijque tomacuayohua. Huan toecahuil tiisraelitame ajsic hasta campa nopa hueyi atl catli itoca Mediterráneo huan hasta campa nopa hueyatl Eufrates.

¹²Huajca ¿para tlen ayacmo techmocuitlahuía? Eltoc quen tijtlamisosolo itepanyo moxocomecamil huan tijcahua ma quitlamicuaca nochi ojtipanyani.

¹³Inijuanti itztoque quen cuapitzome catli hualahuij huan tlapoxoníaj yahualtic tlen tojuanti, huan eltoc quen nopa tecuanime ya techtlamicuaj.