SALMOS 80:3-13

³Toteco Dios, xijchihua ma timocuepaca ica ta. Xitechtlachili ica moxayac tlen senpactoc. Xitechicneli huan xitechmaquixti.

⁴TOTECO, ta tiDios Tlen Tijpiya Nochi Chicahualistli, ¿hasta quema tlamis ticualantos ica tojuanti huan ax tijtlacaquilis quema timomaijtohuaj?

⁵Techmacatoc ma tijcuaca pantzi ica choquistli, huan ma tiquica toixayo.

⁶Tijcajtoc ma techpinahualtica nopa tlaltini tlen techyahualohuaj huan ma techhuetzquilica tocualancaitacahua.

⁷Toteco Dios, ta tiDios Tlen Tijpiya Nochi Chicahualistli, xijchihua ma timocuepaca ica ta. Xitechtlachili ica moxayac tlen senpactoc. Xitechicneli huan xitechmaquixti.

⁸Titechhualicac tlen tlali Egipto queja tieltosquíaj se xocomeca tzontli tlen selic. Tiquintojtocac nopa sequinoc tlacame tlen ax mitzixmatque huan nopano titechtojqui.

⁹Tijcualtlali nopa tlali huan elque queja tijpixque miyac tonelhuayohua. Huan tijtemitijque nopa tlali.

¹⁰Nopa tepetini tiquintlamitzajque ica toecahuil. Huan tielque queja tiocuatini tlen huejcapantique tlen moaxcahua, Toteco.

¹¹Tichamanque huan moscaltijque tomacuayohua. Huan toecahuil tiisraelitame ajsic hasta campa nopa hueyi atl tlen itoca Mediterráneo huan hasta campa nopa atemitl Éufrates.

¹²Huajca ¿para tlen ayoc titechmocuitlahuía? Eltoc queja tijtlamixolehua itepantzaca moxocomeca mil huan tijcahua ma quitlamicuaca nochi ojnemini.

¹³Inijuanti itztoque queja cuapitzome tlen hualahuij huan tlalpoxahuaj yahualtic tlen tojuanti, huan eltoc queja nopa tecuanime ya techtlamicuaj.