Salmos 80:2-16

²Efraín-waganse, Benjamín-waganse, Manasés-waganse, be magar gue. Be-gangued be oyoge, be bela-bela anmar-bendakdage.

³Bab-Dummad, igi-anmar epenne bukwagusa, deyobi, be gannar anmar-imake. Bab-Jehováʼye, be anmargi ise-nued-binsae, be bela-bela anmar-bendake.

⁴Bab-Dummad-Jehová-Bela-Gangued-Nikad, be-urwe-maid-ulale, ¿sanagwadse be-dulamar-bese-goled be itogosuli?

⁵Boed-dummad e-masgunnedyob ega be uksad, ibyanis-obinebaka e-gobedyob ega be imaksad.

⁶Dulemar-anmar-yar-dikarba-bukwamaladi, anmarga allega be imaksad, anmar-isdarmalad anmargi dodomalad.

⁷Bab-Dummad-Bela-Gangued-Nikad, igi-anmar epenne bukwagusa, deyobi be gannar anmar-imake. Bab-Jehováʼye, be anmargi ise-nued-binsae, be anmar-abonoge.

⁸Bab-Dummad, Egipto-yalagi be uva-dub seargusad, Canaán-yargi dulemar-Bab-Dummad-akudakmalad be ononnosgusad, geb we-uva-dub be digsagusad.

⁹Ega be neg-emisad, uva-dub-e-maligan gatik-diglemai be imaksad, bela-yar-gasa nagusad.

¹⁰Bela uva-dub-gagan-urba negsichigwadgi yarmar bukusad, e-dubagan, urwar-sapi-matusur-gwigwichidgi bipirmakde gusad.

¹¹E-anamar, demar-Mediterráneoʼse warmaksad, e-muugan, Éufrates-diwarse nasgumai gusad.

¹²Bab-Dummad, ¿ibiga uva-nainu-e-galu-emakaled be earisa? Bela-dulemar-e-dikarba-nasdamaladi, e-ibe san gwandamalad.

¹³Wedarmala bela-bela wionaid, ibdurgan-ursirmar gundamalad.

¹⁴Bab-Dummad-Bela-Gangued-Nikad, be anmarse gannar dage, nibneg-akale be atake, we-uva-dub be bendakdage.

¹⁵Be-sunnad we-uva-dub be digsagusad. Begadga-guega e-ana be odummosad.

¹⁶Be-uva-dub aimukus maid, soogi ogumaklesad. Be-urwedbali be-dulamar burgwemamaid.