SALMOS 7:7-17

⁷Se tonali masehualme ten nochi talme mitzyahualojtose, huan ta tiquintajtolsencahuas campa timosehuijtoc ipan mosiyaj cuajcualtzi nepa ilhuicac.

⁸Quena, TOTECO tiquintajtolsencahuas nochi masehualme ipan nochi talme. Huajca nojquiya techtajtolsencahua na, TOTECO, ica cati cuali nijchijtinentoc. Ta cati más tihueyi, technextijtoc iniixpa nochi masehualme para amo nijpiya tajtacoli.

⁹Ta, tiToteco Dios, cati titetajtolsencahua xitahuac. Xijtachili inintalnamiquilis masehualme huan xijyejyeco cati quipiyaj ipan iniyolo. Xijtamilti cati quichihuaj nopa amo cuajcualme, pero techchihua tielise titemachme tojuanti cati timonejnemiltíaj cuali moixpa.

¹⁰Toteco Dios nechyahualojtoc para nechmanahuis. Quinmaquixtía cati quipiyaj iniyolo xitahuac iixpa.

¹¹Toteco Dios yaya se juez cati tetajtolsencahua xitahuac. Mojmosta cualani ica amo cuajcualme.

¹²Sinta se masehuali amo moyolcuepas, Toteco Dios quitentis imacheta para quitzontamiltis. Huan quicualtalis icuahuitol cati ica quimictis.

¹³Ya quicualtalijtoc itatehuijca teposhua huan quinhualica imaco para temictis. Quipixtoc miyac cuataminti cati lementoque para tetzontamiltis sinta amo moyolcuepaj.

¹⁴Se masehuali cati amo cuali san quinequi tecocos, huan san moilhuía cati fiero hueli quichihuas huan teipa icamaco quisa san istacatili.

¹⁵Se cati quichihua se ostot para quimasiltis seyoc, teipa ya huetzis campa taxajqui.

¹⁶Pampa nochi tamanti cati amo cuali cati se masehuali quinchihuilía sequinoc, teipa mocuepas ipan ya.

¹⁷Pero na nijtascamatis TOTECO pampa yaya xitahuac. Nihuicas tiohuicat para nijhueyichihuas TOTECO, Yaya Cati Más Hueyi.