SALMOS 7:1-16

¹TOTECO, ta tlen tinoDios, ipan ta nimotemachía para tinechmanahuis. Xinechmaquixti ininmaco nochi tlen nechtoquilijtinemij.

²Nocualancaitacahua itztoque queja tecuanime huan intla ta ax tinechmanahuis, nechcocototzase huan axaca nechmaquixtis.

³TOTECO, intla nelía nijhuicasquía tlajtlacoli, quinamiqui ma nechcocolica.

⁴Intla nijcuepilijtosquía ica tlen ax cuali se nohuampo tlen cuali itztoya nohuaya, huajca quena.

⁵Intla queja nopa nijchijtosquía, huajca ma nechtepotztoca nocualancaitaca. Ma nechajsiti huan ma nechhuahuatatza, huan ma nechpinahualti, pero axaca queja nopa nijchihuilijtoc.

⁶Ximotlalana, TOTECO, ica cualantli. Xicualani miyac ica nocualancaitacahua queja inijuanti nechcocolíaj. Ximoquetza tlatlajco campa tojuanti, huan xiquintetzopa ma nechchihuilica tlen xitlahuac.

⁷Se tonal tlacame tlen nochi tlaltini mitzyahualojtose, huan ta tiquintlajtolsencahuas campa timosehuijtoc ipan mosiyaj yejyectzi nepa elhuicac.

⁸Quena, TOTECO tiquintlajtolsencahuas nochi tlacame ipan nochi tlaltini. Huajca nojquiya tinechtlajtolsencahua na, TOTECO, ica tlen cuali nijchijtinentoc. Ta tlen más tihueyi, tinechnextijtoc iniixtla nochi tlacame para ax nijpiya tlajtlacoli.

⁹Ta, tiToteco Dios, tlen titetlajtolsencahua xitlahuac. Xijtlachili inintlalnamiquilis tlacame huan xijyejyeco tlen quipiyaj ipan ininyolo. Xijtlamilti tlen quichihuaj nopa ax cuajcualme, pero xitechchihua tielise titemachme tojuanti tlen timonejnemiltíaj cuali moixpa.

¹⁰Toteco Dios nechyahualohua para nechmanahuis. Quinmaquixtía tlen quipiyaj ininyolo xitlahuac iixpa.

¹¹Toteco Dios yajaya se juez tlen tetlajtolsencahua xitlahuac. Mojmostla cualani ininca ax cuajcualme.

¹²Intla se tlacatl ax moyolcuepas, Toteco Dios quitentis imachete para quitzontlamiltis. Huan quicualtlalis icuahuitol tlen ica quimictis.

¹³Ya quicualtlalijtoc itlatehuijca teposhua huan quinhualica imaco para temictis. Quipixtoc miyac cuatlamintli tlen lementoque para tetzontlamiltis intla ax moyolcuepaj.

¹⁴Se tlacatl tlen ax cuali san quinequi tecocos, huan san moilhuía tlen fiero hueli quichihuas huan teipa icamaco quisa san istlacayotl.

¹⁵Se tlen quichihua se tlacoyoctli para quimasiltis seyoc, teipa ya huetzis campa tlaxajqui.

¹⁶Queja nopa nojquiya ica tlen fiero se tlacatl quinchihuilía sequinoc, teipa mocuepas ipan ya.