SALMOS 7:1-16

¹TOTECO, ta catli tinoDios, ipan ta nimotemachía para techmanahuis. Techmaquixti ininmaco nochi catli nechtoquilijtinemij.

²Nocualancaitacahua itztoque quen tecuanime huan sintla ta amo techmanahuis, nechcocototzase huan amo aqui nechmaquixtis.

³TOTECO, sintla nelía nijhuicasquía tlajtlacoli, quinamiqui ma nechcualancaitaca.

⁴Sintla nijcuepilijtosquía ica catli amo cuali se nohuampox catli cuali itztoya nohuaya, huajca quena.

⁵Sintla quej nopa nijchijtosquía, huajca ma nechtepotztoca nocualancaitaca. Ma nechajsiti huan ma nechhuahuatatza, huan ma nechpinahualti, pero amo aqui quej nopa nijchihuilijtoc.

⁶Ximotlanana, TOTECO, ica cualantli. Xicualani miyac ica nocualancaitacahua quen inijuanti nechcualancaitaj. Ximoquetza tlajco campa tojuanti, huan xiquinfuerzajhui ma nechchihuilica catli xitlahuac.

⁷Se tonal masehualme tlen nochi tlalme mitzyahualojtose, huan ta tiquintlajtolsencahuas campa timosehuijtoc ipan mosiya yejyectzi nepa ilhuicac.

⁸Quena, TOTECO tiquintlajtolsencahuas nochi masehualme ipan nochi tlalme. Huajca nojquiya techtlajtolsencahua na, TOTECO, ica catli cuali nijchijtinentoc. Ta catli más tihueyi, technextijtoc iniixpa nochi masehualme para amo nijpiya tlajtlacoli.

⁹Ta, tiToteco Dios, catli titetlajtolsencahua xitlahuac. Xijtlachili inintlalnamiquilis masehualme huan xijyejyeco catli quipiyaj ipan ininyolo. Xijtlamilti catli quichihuaj nopa amo cuajcualme, pero techchihua tielise titemachme tojuanti catli timonejnemiltíaj cuali moixpa.

¹⁰Toteco Dios nechyahualohua para nechmanahuis. Quinmaquixtía catli quipiyaj ininyolo xitlahuac iixpa.

¹¹Toteco Dios yaya se juez catli tetlajtolsencahua xitlahuac. Mojmostla cualani ica amo cuajcualme.

¹²Sintla se masehuali amo moyolcuepas, Toteco Dios quitentis imachete para quitzontlamiltis. Huan quicualtlalis icuahuitol catli ica quimictis.

¹³Ya quicualtlalijtoc itlahuilanca teposhua huan quinhualica imaco para temictis. Quipixtoc miyac cuatlamintli catli lementoque para tetzontlamiltis sintla amo moyolcuepaj.

¹⁴Se masehuali catli amo cuali san quinequi tecocos, huan san moilhuía catli fiero hueli quichihuas huan teipa icamaco quisa san istlacatili.

¹⁵Se catli quichihua se ostotl para quimasiltis seyoc, teipa ya huetzis campa tlaxajqui.

¹⁶Quej nopa nojquiya ica catli fiero se masehuali quinchihuilía sequinoc, teipa mocuepas ipan ya.