Text copied!
CopyCompare
Bab-Dummad-Garda-Islidikid - Salmos - Salmos 78

Salmos 78:5-66

Help us?
Click on verse(s) to share them!
5Bab-Dummad, Jacob-waganga Igar mesisad, Israel-dulemarga Igar mesisad. Anmar-dadganga-Igar-uksagusad, be-wagan be odurdakoye,
6adi, yoedse-be-wagan-danimaloedi, bela we-Igar wisgumalagarye, degi, yoedse-mimmigan-gwalulemaloedi, bela we-Igar wisgumarmogagarye, we-mimmiganmoga, we-Igargi na e-mimmigan-odurdakmogoed.
7Deyobi, wemala, Bab-Dummadgi bensuli gumaloed, Bab-Dummad-e-ibmar-dummagan-imaksad iegosurmalad. Bab-Dummad-Igar-Maidba ibsamaloed.
8E-dadganyobi guosurmalad. E-dadgandi, binsaed-sate, uayasuli gusmalad, e-gwagegi innikigwadba nanassurmalad, e-ulubgi Bab-Dummad-sogedba gudii gussurmalad.
9Efraín-wagan, sigu-miemalad-buleganad, degi-inigwele, bila-onolenaid-ibagi wakite gusmalad.
10Israel-dulemar Bab-Dummadbo-Igar-Mesisadba ibmar imaksasurmalad, Bab-Dummad-Igar-Maidba ibsassurmalad.
11Bab-Dummad-ibmar-dummagan-imaksadi, ega ibmar-gegerdaklemalad-oyosadi, bela iesmalad.
12Bab-Dummad Egipto-yargi, Zoán-nebagi, e-dadganga ibmar-dakledisurmalad-oyosgusadi, bela iesmalad.
13Bab-Dummad, Israel-dulemar nabir-obakmalagala demar-dinnaa imaksad, demar gasdibiryob ganna mesisad.
14Bab-Dummad, ibginedba mogirbali Israel-dulemar-idu-nadapi gusad, mutikidba soo-gaedbali idunadapi gusad.
15Bab-Dummad, nega-dulesulidganba akwasaila marisad. A-akwagi dii-aryomai imaksad, geb a-dii-gobmalaga imaksad.
16Bab-Dummad, akwagi dii-aryogega imaksad, diwaryobi dii-aryomai imaksad.
17Degi-inigwele, Israel-dulemar gannar Bab-Dummadgi-isgunai gusmalad, nega-dulesulidganba Bab-Dummad-Bur-Biriginedgi gwisgunai gusmalad.
18Israel-dulemar, yamo Bab-Dummad-wilubdakbi gusmalad, agala, e-abegedba Bab-Dummadse masgunned-egicha gusmalad.
19Bab-Dummadgi sunmaksa gusmalad, sogsagusmalad: “¿Bab-Dummad, sunna anmarga nega-dulesulidganba mas-ukoe? Suli. Anmarga geg uke.
20Ar napiragwa, Bab-Dummad akwasaila-sarsosgua, dii binnasuli aryoargusad. Ar anmarga-mas-ukegala, ¿deyob imakbalo be ebinsae? E-dulamarga, ¿sunna san ukbalo be ebinsae?”
21Bab-Jehová, Israel-dulemar weyob-soge-itosgua, bela-belad uluded. Jacob-wagangi sae-itoded, Israel-dulemargi sabsur-uluded.
22Ar Israel-dulemar Bab-Dummadgi bengusmalad, Bab-Dummad e-bendakosurye binsasmalad.
23Bab-Dummad, nibneg-akale, mogirmarga igar-uksad, degidba, mogirmar argaded.
24Bab-Dummad, Israel-dulemar mas-gunmalagala, mas-manáʼye-nugad ega obatisad, madu-nibneggined-gunmalaga imaksad.
25Bela Israel-dulemar baliwitur-e-madu guchamalad. Nue-immelegedse-gunmalagala, Bab-Dummad ega mas barmialid.
26Bab-Dummad, dad-nakwedsikid-burwa barmiar gusad. E-gangued-nikadba dad-nakwed-argan-nuedsikid-burwa barmiar gusad.
27Bab-Dummad, ukub-mileddaedyobi ega san obatisad, demar-gakaba ukub-mergunaiyob ega nuumar obatisad.
28Bab-Dummad, dulemar-danar-danar-bukwamaladgi, nuumar-babatega imaksad, Israel-dulemar-e-neg-gabmalad-dikarba nuumar-obatisad.
29Israel-dulemar bela-bela-immelegedse mas-guchamalad. Deyobi, Bab-Dummad, ibmar-egichamaladi ega uksad.
30Ar undar-immerba-gudii gussurmalad, ar amba e-gaya-yaba mas-sigua,
31Bab-Dummad-e-urwed egi gwisgunonikid. Bab-Dummad, e-ibe bur-dule-dutusurmalad oburgwisad, Israel-dulemar-bur-nuga-nikamalad ogilosad.
32Degi-inigwele, Israel-dulemar amba isgudii gusmalad, Bab-Dummad-geger-ibmar-daklemalad-imaksadgi bengusmalad.
33A-ulale, Bab-Dummad, Israel-dulemar-e-ibagan sikwas-bunnogedyobi, berguega imaksad, e-birgamar dobed-dummad-abalagi, berguega imaksad.
34Ar Bab-Dummad Israel-dulemar-abar-oburgwisale, geb Israel-dulemar-baigan gannar Bab-Dummad-amiddamalad, gwae-gwae gannar Bab-Dummadse nonidamalad.
35Geb ebinsaddamalad, Bab-Dummad ega akwasailayob guye, Bab-Dummad-Bur-Birigined e-bendaked guye.
36Ar Israel-dulemar e-gayaginbi, e-gwabin-dukuginbi, gakansaar Bab-Dummad-nug-odummodii damalad,
37ar e-ulubgindi ega gakansadii damalad. Bab-Dummadbo-Igar-Mesisadba, sogedba imaksasurmalad.
38Degi-inigwele, Bab-Dummaddi wemar-wiledaksad, e-isgusad ega elisad, wemar-obelossurgusad. Bab-Dummad, gannar-gannar na e-urwed-barganai gusad, e-urwedba ibmar-imaknai gussulid.
39Bab-Dummad ebinsasgusad, wemarde unnila dulemar-guye, unnila burwa-goleyob guye, gwen bar daklegosurye.
40Israel-dulemar, nega-dulesulidgangi, bukidargus Bab-Dummadgi-yoledanigusmalad. Nega-dulesulidgangi Bab-Dummad-wile-itogega imaksamalad.
41Gannar-gannar Bab-Dummad-wilubdaknai gusmalad, Israel-e-Bab-Dummad-Isligwaled-ourwenai gusmalad.
42Bab-Dummad-e-gangued bipisaar ebinsassurmalad, e-isdarmaladse-wilebukwa-onolesgusadi, ebinsassurmalad.
43Egipto-yargi, Bab-Dummad ibmar-dakledisurmalad-oyosad iesmalad, neba-Zoánʼye-nugadgi ibmar-dummagan-imaksad iesmarbalid,
44Bab-Dummad, Egipto-yar-e-diwarmar abega obinnisad, Egipto-dulemar, a-diwar geg gobe gusmalad.
45Bab-Dummad, Egipto-dulemargi, gukurmar-bela-ibmar-biin-imakmalad barmiar gusad. Noomar-ibmar-obelomalad barmiar gusbalid.
46Bab-Dummad, Egipto-dulemar-e-ibmar-gwag-wesmaladi, sese-burwigana-omaega imaksad, e-ibmar-gwag-gullemalad-digarmaladi, sesega urmaksabalid.
47Bab-Dummad, Egipto-dulemar-e-uvaʼdub-digarnanaid, dii-gwamakaled-obatisadgi obelosad, e-higo-sapimar, boo-gwamakarmaladgi obelosad.
48Bab-Dummad, Egipto-dulemar-e-moli-bebe-nikamalad, dii-gwamakaled-obatisadgi oburgwisad. E-sibad-wawaadmar mar-egi-odesadgi obelosad.
49Bab-Dummad, Egipto-dulemargi bela-bela-e-urwed, e-sae-itoged, e-isdar-itoged, e-sae-daked barmiar gusad. Baliwitur-ibmar-obelomalad danagwen barmiar gusad.
50Bab-Dummad na e-urwed bar bargassur gusad. Burgwedgi, Egipto-dulemar bar ollor-imaksasulid, boni-dummaganga urmaksagusad.
51Bab-Dummad, bela Egipto-dulemar-e-machi-sailaginmalad oburgwisad, Cam-dulemar-e-machi-sailaginmalad ogilosad.
52Bab-Dummad, sibad-wawaad-danar-bukwadyobi, Israel-dulamar-idunadapi gusad, nega-dulesulidganba senadapi gusad.
53Bab-Dummad, Israel-dulamar-mer-dobee-itomalaga, igar-nueganba semai gusad. E-isdarmaladdi demargi-gundilegega imaksad.
54Bab-Dummad, na e-yar-islidikidse Israel-dulamar-senoni gusad, na e-garganguedgi we-yarmar-susadse senonikid.
55Bab-Dummad, Israel-dulemar-nadapid-idu dule-baigan-bukwad onosgusad, we-dulemar-e-napamar, Israel-dulemargadga-guega ega uksad. Deyobi, Bab-Dummad, a-napamargi, Israel-dadgan-dummagan-wagan urbisad.
56Degi-inigwele, Israel-dulemar Bab-Dummad-wilubdaknai gusmalad, Bab-Dummad-Bur-Biriginedgi aibitemalad, e-Igar-Maidba ibsassurmalad.
57E-babganyobi Bab-Dummadgi aibatemalad, egi yolenai gusmalad. Israel-dulemar, warsi-binsaledyob dopere gusmalad.
58E-bab-dummadse-goled-neg-sobsamaladba, Bab-Dummad-oulusmalad, ibmar-e-bab-dummadga-imakdimalad-e-wilub-sobsamaladba, Bab-Dummad-nobguega imaksamalad.
59Bab-Dummad, weyob ibmar-daksagua, uluded, degidbali, bela Israel-dulemar-obachad.
60Silo-neggweburgi e-neg-meged-siidgi aibated. Agi, Bab-Dummad dulemar-abargi maidaenad.
61Bab-Dummad, na e-Ulu, e-gangued-yeerdakleged-e-wilubga guedi, e-isdarmaladse-galegega imaksad.
62Bab-Dummad bela-bela e-dulamargi urwemaisoggu, es-suidgi e-dulamar-oburgwilegega imaksad.
63E-dula-sapingan soogi gummaksamalad, e-yaganga sui-nikued-ibagi-namakleged namaklessulid.
64E-dule-irwa-Bab-Dummadse-gormalad es-suidgi oburgwilesmalad, E-omegan-e-ibe-sui-burgwismaladi, e-suimarga gwen bonai gussurmalad.
65Geb Bab-Dummad, igi-dule-gabmair atakardae, deyobi atakalid. Igi-dule-bila-onoged-buled vino-gobnair binnasuli gormakdedae, deyobi Bab-Dummad uludedba binnasuli goted.
66Bab-Dummad, e-isdarmalad-sikirmakega imaksad, degisadegu bingeguega imaksad.

Read Salmos 78Salmos 78
Compare Salmos 78:5-66Salmos 78:5-66