Text copied!
CopyCompare
Xela wezria cube nen salmo caʼ - Salmos - Salmos 78

Salmos 78:3-66

Help us?
Click on verse(s) to share them!
3da ca' bendxu, ne bé̱nbeadxu na, da ca' belixru be'e xra xrtáudxu ca' dxi'u.
4Quebe gucáchedxu na lau zrí'inedxu ca'. Guzénquezdxu zrí'inedxu ca' ca naca xel-la' szren chee̱ Xránadxu, ne ca naca xel-la' waca chee̱', ne ca zaj naca da zren ca' da be̱ne̱'.
5Bzue̱' tu da nadxixruj bea na da xelún benne' Israel ca', ne da bdxixruj be'ene̱' ca' da xelún zri'ine zre sua Jacob. Gunná bé'ene̱' xra xrtáudxu ca' xuluzenne̱' bi chee̱' ca' ca naca da gunná bé'ene̱',
6chee̱ xelúnbea zrí'ine̱' bidu ca' za xelálajbe' ca naca na, na' bi caní xuluzenbe' zrí'inebe' da na',
7chee̱ xuluxrén lázrebe' Dios, ne quebe xelal-la lázrebe' da ca' be̱n Dios, ne chee̱ xuluzúabe' dizra' da ca' gunná be'e̱.
8Quebe xelácabe' ca gulaca xra xrtáube' ca'. Benne' ca' quebe buluzúe̱' dizra' chee̱', ne guledábague̱' Le̱', ne quebe buluzúa chúchue̱' ca buluxrén lazre̱' Dios, ne quebe gulaque̱' li lazre' lu da naca chee̱ Dios lu be' zaj nácaqueze̱'.
9Benne' zrí'ine zre sua Efraín, benne' zaj nu'e̱ da dxuluchínene̱' lu wedil-la buluzrúnnuje̱' naga dxaca wedil-la.
10Quebe belune̱' ca naca xel-la' wezría da be̱n Dios, ne quebe buluzúe̱' dizra' da gunná bé'ene̱'.
11Gulal-la lazre̱' da ca' be̱n Dios, ne xel-la' waca ca' blé'ene̱' Le̱'.
12Lau xra xrtawe̱' ca' be̱ne̱' xel-la' waca ca' lu xe̱zr la xu Egipto, ne lu xe̱zr la xu Zoán.
13Gusalje̱' neza lu nísadau' naga guledé benne' ca'. Be̱ne̱' nísadau' na' ca xi'a ca' chalá'a weaj.
14Te zra blé'ene̱' benne' ca' neza nen tu beuj bza da xjácale̱ne̱', ne chizrela nen beuj bza da naca na ca tu xi'.
15Gulé̱'e̱ xiaj ca' naga naca xu bizre, na' bxí'aje̱' benne' ca' nisa da gulaj na le̱'e̱ xiaj ca' ca tu xe̱gu nisa.
16Be̱ne̱' gulaj tu xe̱gu nisa le̱'e̱ xiaj na', na' bzriluj na ca tu xe̱gu zren.
17Lácala be̱ne̱' caní belúndxaqueze̱' dul-la lau Dios le̱'e̱ xixre' lawe' lataj, ne guledábague̱' Dios nape̱' dute̱ xel-la' szren.
18Gulegú'u lazre̱' xulu'zúa zrie̱' Dios. Gulenabe̱' xelawe̱' ca da dxelezá lazre' le̱'.
19Gulenné̱' chee̱ Dios, gulenné̱': ¿Wazeque Dios na' gunne̱' da gágudxu le̱'e̱ xixre' nigá?
20Da líqueze gulé̱'e̱ xiaj na', na' gulaj nisa na', na' bzriluj na ca tu xe̱gu zren. ¿Wazéquequezne̱' gunne̱' dxi'u xeta, ne gunne̱' be̱la' da gágudxu?
21Chee̱ le̱ na' bzra'a Xránadxu gate benne̱' da na', ne gusel-le̱' xi' da bzezxe na bal-la bénneache chee̱', na' bsedxí'ule̱'e̱ xel-la' dxezrá'a chee̱' nen benne' Israel ca',
22lawe' da quebe guléajle̱'e̱ chee̱ Dios, ne quebe buluxrén lazre̱' Le̱' guselé̱' le̱'.
23Gunná bé'ene̱' beuj zran xabáa, ne gusálaje̱' dxa xu'u chee̱ xabáa,
24na' be̱ne̱' bxinnaj xeta maná ca dxinnaj xiuj chee̱ gulagu benne' chee̱' na. Bnézruje̱' le̱' da naca ca zrua' chee̱ xabáa.
25Gulawe̱' da dxelagu gubáz chee̱ xabáa ca'. Gusél-lale̱'e̱ da gulawe̱', na' gulélajte̱quezene̱'.
26Be̱ne̱' guca be' da za' chalá'ala naga dxalaj gubizra, ne xel-la' waca chee̱' be̱ne̱' guca be' za' chalá'ala naga dxedé gubizra beu' zaga,
27na' gusel-le̱' chee̱ benne' ca' be̱la' ca ze̱ bxrte xu, béadu zaj zua xrila naxanba' ca xuzre' da dxe' dxu'a tu xe̱gu zren.
28Be̱ne̱' guléxrujba' chale'aj chee̱ benne' ca'. Guléxrujba' dúte̱queze naga zaj zua xu'u xide chee̱'.
29Gulawe̱'-ba', ne gulélajquezene̱'. Dios bnézruje̱' chie̱' ca naca da gulaca lazre̱'.
30Gate quebe ne xelélajene̱', ne ne dxelawe̱'-ba',
31bzra'a Dios benne' ca', na' be̱tie̱' benne' zaj nácadxe̱' benne' wal-la, ne benne' Israel ca' zaj nácadxe̱' benne' waca.
32Láqueze be̱ne̱' caní, na' belúndxaqueze̱' dul-la, ne láqueze belelé'ene̱' xel-la' waca ca' da be̱ne̱', quebe buluxrén lazre̱' Le̱'.
33Chee̱ le̱ na' guchugue̱' zra chee̱ benne' ca' ca tu be' dxecá'adxu, ne ca zaj naca iza da gulezúe̱', bdee̱' le̱' lu da zi' da xa'.
34Gate be̱tie̱' bal-la benne' ca', na' xezícadxe̱' belexaque̱' chee̱ Dios. Belexebí'i lazre̱', ne du lazre̱' buluchálajle̱ne̱' Le̱'.
35Xeajlesá lazre̱' naca Dios Benne' dxuxúe̱' le̱', ne Dios na' nape̱' dute̱ xel-la' szren naque̱' Bénnea' bxá'awene̱' le̱',
36san quebe guca li lazre' da gulenné̱' lawe' da belún lazre̱' lau Dios.
37Quebe gulaque̱' li lazre' nen Le̱', ne quebe belune̱' du lazre' ca naca xel-la' wezría chee̱'.
38Dios bexache lazre̱' chee̱ benne' ca', ne bnite lawe̱' dul-la belune̱', ne quebe bzria xi'e̱ le̱'. Zane' lásate̱ bzue̱' chalá'ala xel-la' dxezrá'a chee̱', ne quebe bzre̱'e̱ le̱' dute̱ ca da dxéquene̱'.
39Xeajsá lazre' Dios zaj naque̱' be̱la' dxen. Zaj naque̱' ca tu be' da dxedé na, ne quebe xezrín na.
40Zane' lasa guledábague̱' Le̱' le̱'e̱ xixre' lawe' lataj na', ne zane' lasa buluzúe̱' Le̱' baxache'.
41Zane' lasa buluzúe̱' Dios chalá'ala, ne buluché̱'e̱ Dios lá'azxa chee̱ benne' Israel ca'.
42Gulal-la lazre̱' ca naca xel-la' waca zren chee̱', ne ca be̱ne̱' lu zra na' bxá'awene̱' le̱' lu da zi' da xa',
43gate be̱ne̱' xel-la' waca ca' lu xe̱zr la xu Egipto, ne blé'ene̱' da ca' da dxebánedxu lu xe̱zr la xu Zoán.
44Bexune̱' xe̱gu chee̱' ca' dxen, na' québedxa guca da xele'aj benne' Egipto ca'.
45Gusel-le̱' be̱'a ládujla benne' ca', be̱ buludeba' le̱' xel-la' zi'. Gusel-le̱' bluzru ca' buluzría xiba' xe̱zr la xu chee̱'.
46Gusel-le̱' biche zu ca' guláguba' lina chee̱', ne buluzría xiba' da zaj zua lu xe̱zr la xu chee̱'.
47Gusel-le̱' xiaj bezxe' zri'a da bzria xi na lba uva chee̱' ca', ne gusel-le̱' da zaga da bsebizre na xaga higo chee̱' ca'.
48Gusel-le̱' xiaj bezxe' zri'a da be̱te na be̱ xixre' chee̱' ca', ne gusel-le̱' xesa da be̱te na zrila' chee̱' ca'.
49Bdee̱' benne̱' Egipto ca' lu xel-la' zi' zren, lawe' da bzrá'ale̱'e̱ benne' ca', na' guca da ca' ca zánete̱ gubáz ca' chee̱ xel-la' gute.
50Quebe bzague̱' xel-la' dxezrá'a chee̱', ne quebe bnite lawe̱' chee̱' chee̱ quebe xelátie̱', san be̱tie̱' le̱' nen tu xízrawe̱' wal-la.
51Be̱tie̱' bi biu nedxu chee̱ benne' ca', bi biu nedxu ca' chee̱ benne' Egipto ca'.
52Nadxa beche̱'e̱ benne' chee̱' ca' ca tu benne' dxeche̱'e̱ zrila' ca', ne bsi'e̱ le̱' le̱'e̱ xixre' lawe' lataj.
53Bsi'e̱ le̱' zri'a chawe', ne quebe bi belezrebe̱', san gulate benne' guledábague̱' Le̱' lu nísadau'.
54Beche̱'e̱ le̱' lu xe̱zr la xu lá'azxa chee̱', naga zua xi'a nigá da guca cheé̱queze̱'.
55Bebéaje̱' benne' zaj zre̱'e̱ lu xe̱zr la xu na' lau benne' chie̱' ca', na' gulé̱'e̱ xe̱zr la xu chee̱' cha chee̱ benne' Israel ca', ne bzre̱'e̱ le̱' lizre benne' ca' bebéaje̱'.
56Da xula buluzúe̱' Dios chalá'ala, ne buluché̱'e̱ Dios, nape̱' dute̱ xel-la' szren. Quebe buluzúe̱' dizra' da ca' gunná be'ene̱' le̱'.
57Da xula guledábague̱' Dios ca belún xra xrtawe̱' ca'. Gulaque̱' ca tu bdxeque' xala chee̱ xaga nalá xéche'ze.
58Buluché̱'e̱ Le̱' ne̱ chee̱ lataj ca' naga bulucá'ana szrene̱' bedáu' xiaj xaga ca', ne ne̱ chee̱ bedáu' xiaj xaga chee̱' ca' bzrá'ale̱'e̱ Dios.
59Bzra'a Dios gate blé'ene̱' na, na' gucuídele̱'e̱ne̱' benne' chee̱' ca', benne' Israel.
60Guleaj xíchaje̱' xu'u xide lá'azxa chee̱' zua na xe̱zre Silo, xu'u xide na' guzuáqueze̱' ládujla benne' ca'.
61Be̱'e̱ lataj belecá'a benne' ca' dxeledábague̱' dxi'u xi'ina lá'azxa chee̱', da na' dxulé'e na xel-la' waca, ne xel-la' szren chee̱'.
62Bzre̱'e̱ benne' chee̱' ca', na' bdee̱' le̱' lu na' benne' ca' belútie̱' le̱'.
63Benne' wal-la ca' gulátie̱' lu wedil-la. Quebe nu zra' benne' wegu', benne' xelezúale̱ne̱' nu'ula wegu' ca'.
64Cá'anqueze gulate bxruze ca' lu wedil-la, na' nu'ula chee̱ bxruze ca' quebe gulebezre xache̱' chee̱ bxruze ca'.
65Nadxa guca Xránadxu ca tu benne' dxexebane̱' lu bchigala. Guque̱' ca tu benne' wal-la dxebezre xe̱'e̱ gate ba né'aje̱' xrise uva wal-la.
66Na' blague̱' benne' guledábague̱' Le̱', ne bca'ane̱' le̱' cá'aze chadía chacanna.

Read Salmos 78Salmos 78
Compare Salmos 78:3-66Salmos 78:3-66