SALMOS 78:1-16

¹Nomasehualhua, xijtacaquilica notamachtil huan nochi cati niquijtohua,

²pampa nimechnextilis tamanti cati amo aqui más quimati cati panoc huejcajquiya.

³Tamanti cati tijcactoque huan tijmajtoque pampa totatahua techpohuilijque.

⁴Quena, nimechmatiltis para anhuelise anquinpohuilise amoconehua nochi nopa cuajcualtzitzi huan huejhueyi tamanti, cati TOTECO quichijqui ica ihueyi chicahualis.

⁵Toteco Dios quimacac miyac tanahuatilme Jacob ipan tali Israel para ma monejnemiltica xitahuac, huan quinnahuati tohuejcapan tatahua ma quinnextilica ininconehua,

⁶huan iniixhuihua cati tacatise teipa. Huan quej nopa nochi masehualme quinixmatise itanahuatilhua Toteco.

⁷Yeca hasta ama miyac masehualme quintepanitaj itanahuatilhua Toteco Dios, huan motemachíaj ipan ya para quinmocuitahuis. Huan amo ma quielcahuaca nochi nopa huejhueyi tamanti cati quichijtoc Toteco. Monequi ma quitoquilijtinemica nochi itanahuatilhua.

⁸Pampa amo quinamiqui para elise quej inihuejcapan tatahua cati moyoltetilijque huan amo tatepanitaque. Inijuanti amo elque temachme ica Toteco Dios, yon amo quimactilijque iniyolo, yon ininemilis.

⁹Nopa masehualme ten tali Efraín mocuepatoj huan cholojque ipan nopa tonali quema yahuiyayaj tatehuitij. Quena, cholojque masque quipiyayayaj miyac teposti para tatehuise.

¹⁰Amo quintepanitaque itanahuatilhua Toteco Dios, huan amo quinejque nejnemise ipan iojhui.

¹¹Quielcajque nochi tamanti cati yaya hueli quichihua. Amo quielnamijque nopa cuajcualtzi tiochicahualnescayot cati quichijqui Toteco.

¹²Quena, Toteco Dios quichijqui miyac tamanti iniixpa inihuejcapan tatahua ipan tali Egipto campa itoca Zoán.

¹³Quitajcoxelo nopa hueyi at huan quichijqui ma panoca. Ipan ome lados nopa at moquetzqui quej tepamit.

¹⁴Tonaya quinyacanqui ica se mixti para quinecahuilis, huan ica tayohua ica se mixti cati taahuiyaya quej tit.

¹⁵Ipan huactoc tali quitapo nopa hueyi tet huan quisqui miyac at para atique hasta aixhuique.

¹⁶¡Quena, ipan tet quisqui miyac at cati motalo quej se hueyat!