SALMOS 77:5-14

⁵Tlatoctzitzi nimonejnehuilía tlen nopa yejyectzi tonali huan xihuime catli panoque huejcajya.

⁶Niquelnamiqui sesen tlayohua quema nihuicayaya ica paquilistli. Quena, nimotlajtlachilía huan niquita para ama nochi tlamantli tlahuel mopatlatoc.

⁷¿Huelis Toteco nechtlahuelcajtoc para nochipa? ¿Huelis ayacmo quema nechpalehuis?

⁸¿Huelis ya tlanqui itlaicnelilis ica na? ¿Huelis ya tlanqui catli achtihuiya techtlajtolcahuili techmacas?

⁹¿Huelis Toteco Dios ya quielcajqui para monequi nechchihuilis catli cuali na catli niitztoc ipan tequipacholi? ¿Huelis tlahuel cualantoc huan yeca ayacmo quinequi nechtlasojtlas?

¹⁰Huan ipan nohueyi tequipachol nimoilhui: “Toteco Catli Más Hueyi mopatlatoc. Achtihui niitztoya inejmac huan nechtiochihuayaya miyac, pero ama nechcualancaita.

¹¹Más cuali niquelnamiquis nochi nopa huejhueyi tiochicahual nextili catli TOTECO nechchihuili huejcajya.”

¹²Quena, mojmostla nimoilhuis tlen nopa huejhueyi tlamantli para nochipa. Amo hueli nijcahuas nimonejnehuilis tlen yaya quichijtoc.

¹³¡NoTeco Dios, nelía tlatzejtzeloltic nochi moojhui! Amo aqui seyoc dios catli más quipiya chicahualistli que ta, titoTeco.

¹⁴¡Ta tiDios catli tijchihua huejhueyi tiochicahual nextili huan miyac tlamantli catli masehualme quisentlachilíaj! Huan hasta ama quejipa tijnextía mohueyi chicahualis.