SALMOS 77:2-15

²Quema nechajsic miyac taijyohuilisti nimantzi nijtemo noTeco. Seyohual nimomatanantoya huan nimotatajtiyaya, huan amo nijcahuili yon se talojtzi. Amo nipaquis hasta yaya monextis huan nechcaquis.

³Nimoyolilhuía ten Toteco Dios huan niyolpitzahuía huan nichoca. Nimotequipachohua pampa tami nochicahualis, yeca tahuel nijnequi ma nechpalehui.

⁴Toteco, ta amo techcahuilía ma nicochi. Hasta amo hueli nicamanalti pampa tahuel hueyi ni notequipachol.

⁵Talojtzitzi nimoyolilhuía ten nopa cuajcualtzi tonali huan xihuime cati panoque huejcajquiya.

⁶Niquelnamiqui nopa yohualme quema nihuicayaya ica paquilisti. Quena, nimotajtachilía huan niquita para ama nochi tamanti tahuel mopatatoc.

⁷¿Huelis Toteco nechtahuelcajtoc para nochipa? ¿Huelis ayecmo quema nechpalehuis?

⁸¿Huelis ya tanqui itaicnelilis ica na? ¿Huelis ya tanqui cati achtohuiya techtajtolcahuili techmacas?

⁹¿Huelis Toteco Dios ya quielcajqui para monequi nechchihuilis cati cuali na cati niitztoc ipan tequipacholi? ¿Huelis tahuel cualantoc huan yeca ayecmo quinequi nechtasojtas?

¹⁰Huan ipan nohueyi tequipachol nimoilhui: “Toteco Cati Más Hueyi mopatatoc. Achtohui niitztoya inejmat huan nechtiochihuayaya miyac, pero ama nechcualancaita.

¹¹Más cuali niquelnamiquis nochi nopa huejhueyi tiochicahualnescayot cati TOTECO nechchihuili huejcajquiya.”

¹²Quena, mojmosta nimoilhuis ten nopa huejhueyi tamanti para nochipa. Amo hueli nijcahuas nimoyolilhuis ten yaya quichijtoc.

¹³¡NoTeco Dios, nelía tatzejtzeloltic nochi moojhui! Amo aqui seyoc dios cati más quipiya chicahualisti que ta, titoTeco.

¹⁴¡Ta tiDios cati tijchihua huejhueyi tiochicahualnescayot huan miyac tamanti cati masehualme quitachilíaj! Huan hasta ama quejipa tijnextía mohueyi chicahualis.

¹⁵Ica mohueyi chicahualis techmanahui, timomasehualhua cati tiiconehua Jacob huan José.