SALMOS 77:2-13

²Quema nechajsic miyac tlaijiyohuilistli nimantzi nijtemo noTeco. Seyohual nimomatlalantoya huan nimomaijtohuayaya, huan ax nijcahuili niyon se tlalochtli. Ax nipaquis hasta yajaya monextis huan nechcaquis.

³Nimoyolilhuía tlen Toteco Dios huan niyolpitzahuía huan nichoca. Nimocuesohua pampa tlami nochicahualis, yeca tlahuel nijnequi ma nechpalehui.

⁴Toteco, ta ax tinechcahuili ma nicochis. Ax tinechcahuilía nimomaijtos pampa tlahuel hueyi ni nocuesol.

⁵Ajachica nimoyolilhuía tlen nopa yejyectzi tonali huan nopa xihuitl tlen panoque huejcajquiya.

⁶Niquilnamiqui nopa miyac yohuali quema nihuicayaya ica paquilistli. Quena, nimotlajtlachilía huan niquita para ama nochi tlamantli tlahuel mopatlatoc.

⁷¿Huelis Toteco nechtlahuelcajtoc para nochipa? ¿Huelis ayoc quema nechpalehuis?

⁸¿Huelis ya tlanqui iteicnelilis ica na? ¿Huelis ya tlanqui tlen achtohuiya nechtlajtolcahuili nechmacas?

⁹¿Huelis Toteco Dios ya quiilcajqui para monequi nechchihuilis tlen cuali na tlen niitztoc ipan cuesoli? ¿Huelis tlahuel cualantoc huan yeca ayoc quinequi nechtlasojtlas?

¹⁰Huan ipan nohueyi cuesol nimoilhui: “Toteco Tlen Más Hueyi mopatlatoc. Achtohui niitztoya inejmatl huan nechtiochihuayaya miyac, pero ama nechcocolía.

¹¹Más cuali niquilnamiquis nochi nopa huejhueyi tiochicahualnescayotl tlen TOTECO nechchihuili huejcajquiya.”

¹²Quena, mojmostla nimoilhuis tlen nopa huejhueyi tlamantli para nochipa. Ax hueli nijcahuas nimoyolilhuis tlen yajaya quichijtoc.

¹³¡NoTeco Dios, nelía tlatzejtzeloltic nochi moojhui! Axaca seyoc dios tlen más quipiya chicahualistli que ta, titoTeco.