SALMOS 75:4-8

⁴Niquinilhui masehualme cati mohueyimatij ma amo mohuihuinequica. Huan niquinilhui taixpanoca masehualme ma amo mohueyimatica.

⁵Niquinilhuijtoc cati quipiyaj chicahualisti ma amo tetamiijilhuica. Huan quema ancamanaltij, amo ximoyacaquetzaca para anmohueyimatise.

⁶Pampa san Toteco hueli tehueyitalía. Amo aqui cati huala ten campa quisa tonati, o ica campa oncalaqui, o campa huactoc tali huelis quihueyitalis se masehuali. ¡Amo!

⁷San Toteco Dios itztoc Juez. San yaya nopa tetajtolsencajquet cati hueli tehueyitalía huan temaca chicahualisti. Huan sequij masehualme quinhueyitalía huan sequij quinechcapantalía.

⁸Toteco quipixtoc imaco se caxit cati temitoc ica tailisti cati nelía cococ. Huan ya nopa eltoc nopa tatzacuiltili cati quintitanilis taixpanoca masehualme ipan ni taltipacti. Huan monequis quiise hasta quitamise ica nochi itetejtzo.