SALMOS 75:1-7

¹¡Timitztlascamatij, Toteco Dios, pampa tiitztoc tonechca! Pampa tlacame tepohuilíaj nochi huejhueyi chicahualnescayotl tlen tijchijtoc.

²Huan Toteco Dios quiijtohua: “Quena, quema ya nimocualtlalijtos, na niquixtlalis se tonal. ¡Huan niquintlatzacuiltis queja quinamiqui nochi nopa tlaixpanoca tlacame!

³Yonque ni tlaltepactli mojmolinis huan nochi tlacame huihuipicase, itlaquetzalhua ax huetzise pampa na niquinquetztoc cuali ipan ininlugar.”

⁴Niquinilhui tlacame tlen mohueyimatij ma ax mohuihuinequica. Huan niquinilhui tlaixpanoca tlacame ma ax mohueyimatica.

⁵Niquinilhuijtoc tlen quipiyaj chicahualistli ma ax tetlamiijilhuica. Huan quema incamatij, amo ximoyacaquetzaca para inmohueyimatise.

⁶Pampa san Toteco hueli tehueyitlalía. Axaca tlen huala tlen campa quisa tonati, o ica campa oncalaqui, o campa huactoc tlali huelis quihueyitlalis se tlacatl. ¡Axtle!

⁷San Toteco Dios itztoc Juez. San yajaya nopa tetlajtolsencajquetl tlen hueli tehueyitlalía huan temaca chicahualistli. Huan sequin tlacame quinhueyitlalía huan sequin quinicnotlalía.