SALMOS 74:8-22

⁸Huan quiijtojque ipan ininyolo: “Ma tijtlamisosoloca nochi catli onca ipan ni tlali.” Huan yajque campa hueli huan quitlatijque nochi israelita tiopame, campa timosentiliyayaj para timitzhueyichihuase, Toteco Dios.

⁹Ayacmo onca niyon se tlamantli catli quinextía para timomasehualhua. Ayacmo onca tlajtol pannextiani. Ayacmo aqui huelis techilhuis hasta quema tlamis nochi ya ni.

¹⁰Toteco Dios, ¿hasta quema tlamis mitzmahuispolohuaj mocualancaitacahua? ¿Atlac amo quema tiquintlatzacuiltis?

¹¹¿Para tlen tihuejcahua para techpalehuis? ¿Para tlen amo tijnextía mohueyi chicahualis huan techpalehuía?

¹²Hasta tlen huejcajya Toteco Dios itztoya notlanahuatijca. Yaya nechpalehuijtoc ipan ni tlaltipactli huan campa hueli campa niyajtoc.

¹³Ica mochicahualis tijxelo hueyi atl. Huan tiquintzontlamilti huejhueyi tlapiyalme catli temajmatijque catli itztoyaj ipan atl.

¹⁴Tijtzonxamani nopa hueyi tlapiyali catli itoca leviatán, huan inacayo tiquinmacac ma quicuaca nopa tecuanime catli itztoyaj ipan huactoc tlali.

¹⁵Tijchijqui ma meya atl ipan huejhueyi amelme huan para hueyame ma quipiyaca atl. Nojquiya tiquinhuatzqui hueyame catli amo quema huactoyaj.

¹⁶Ta moaxca tonali huan yohuali. Ta tijchijchijqui metztli huan tonati.

¹⁷Ta tijtamachijqui hasta canque tlamis tlaltipactli. Nojquiya ta tijchihua ma tlatotoniya huan ma tlaseseya.

¹⁸TOTECO, xiquita quenicatza mitzmahuispolohuaj mocualancaitacahua, huan quenicatza mitztlaijilhuíaj nopa masehualme catli mohueyimatij.

¹⁹¡TOTECO, amo techtlahuelcahua! Xijmanahui mopaloma imaco nopa cuajtli. Quena, xiquinmanahui momasehualhua ininmaco nopa masehualme catli itztoque quen tecuanime.

²⁰¡Xiquelnamiqui nopa camanal sencahuali catli tijchijtoc tohuaya! Pampa ni tlali temitoc ica tzintlayohuilotl huan ica masehualme catli mosisiníaj.

²¹Amo xijcahua para tlatoctzitzi ma techmahuispoloca tojuanti catli tijpanotoque miyac tlaohuijcayotl. Xiquinpalehui catli teicneltzitzi huan amo tleno quipiyaj para huelis mitzpaquilismacase.

²²Toteco Dios, ximotlanana huan ximomanahui ica catli quiijtohuaj mocualancaitacahua. Xiquelnamiqui nochi nopa camanali catli ica mitztlaijilhuijtoque nochi se tonal.