SALMOS 74:4-12

⁴Nopano tzajtzique mocualancaitacahua ica paquilistli quema tlaxolehuayayaj. Teipa san techhuetzquilijque huan quinquetzque ininteteyohua para quinextise ya techtlanquejya.

⁵Hualajque ica ininhachas huan huejhueyi martillos hasta nesiyaya queja cuajcuahuini tlatlajco cuatitlamitl.

⁶Huan ama ica ininteposhua quitlapanque huan quixolejtoque nochi tlamantli tlen ica tlayejyecchijtoyaj motiopa.

⁷Quena, motiopa quitlatijque, huan quimahuispolojque moixpa nopa tlen quihuicayaya motoca, huan quimajcajque tlalchi.

⁸Huan quiijtojque ipan ininyolo: “Ma tijtlamixolehuaca nochi tlen onca ipan ni tlali.” Huan yajque campa hueli huan quitlatijque nochi israelita tiopantini, campa timosentiliyayaj para timitzhueyichihuase, Toteco Dios.

⁹Ayoc onca niyon se tlamantli tlen quinextía para timotlacajhua. Ayoc onca tiocamanalohuani. Ayoc aca huelis techilhuis hasta quema tlamis nochi ya ni.

¹⁰Toteco Dios, ¿hasta quema tlamis mitzmahuispolohuaj mocualancaitacahua? ¿Huelis ax quema tiquintlatzacuiltis?

¹¹¿Para tlen tihuejcahua para titechpalehuis? ¿Para tlen ax tijnextía mohueyi chicahualis huan titechpalehuía?

¹²Hasta tlen huejcajquiya Toteco Dios itztoc notlanahuatijca. Yajaya nechpalehuijtoc ipan ni tlaltepactli huan campa hueli campa niyajtoc.