SALMOS 74:3-23

³Da ka' gaze yedjḻe'elo' ka nbia yi' yež nga, na' ka nak da' ẕinnj da' bengak benne' ka' che latje la'y chio'.

⁴Ẕbéžeya'agak benne' ka' bi ẕḻé'egekle' Le' chawe' gachje ḻawle gan zej ndobe benne' chio' ka'. Bdá'gake' nga da' ẕḻoe'elen yo'oto' ḻo ná'gake'.

⁵Bchínnjgake' yež ni, ka žon to benne' ẕchoge' yógo'te yag ka' zej zen to ḻaw ya'a.

⁶Ḻen ya wag chégake' ka', na' ḻen yag chégake' ka', bchínnjgake' yógo'te da' x̱tan ka' che yodo' chio'.

⁷Bzéygake' latje la'y chio'. Bká'ngake' ka'ze ližkzo' Le'. Bchínnjgaken'.

⁸Wnnágake': “¡Wžía yi'žo ḻégake' to chi'ize!” Bzéygake' yógo'te yo'o gan bká'n ẕento' Le' dot ḻo yežlyó chio'.

⁹Biž bi ẕḻe'elto' da' nak la'y, dan' bchisto' ḻo yežlyó cheto'. Biž zoa no benne' wchaḻje' ḻo wlazo' Le', na' bi zoa no benne' ladjw neto', benne' nnezle' batx̱ yelato'.

¹⁰X̱anto' Dios, ¿to chi'ize wchix̱gak benne' ka' neto', benne' ka' žsaka' zí'gake' neto'? ¿To chi'ize nnegak benne' ka' bi ẕḻé'egekle' Le' chawe' che La la'y chio' Le'?

¹¹¿Biẕ chen' bi be žono' chegak benne' ka'? ¿Biẕ chen' bi ẕžia yi'o benne' wen da' ẕinnj ka'?

¹²San Le', Dios, nako' Benne' Wnná Bia' chia' ža ni'te. Le' bžia yi'o benne' ka' dot ḻo yežlyó nga.

¹³Ḻen yeḻa' wak ẕen chio' beno' nisdo' chope ḻa'a. Wló'o yichj bia ẕenḻe'e ka' ḻo nisdo'.

¹⁴Bzoẕjo' yichj bia ẕenḻe'e, bian' leba' lebiatán, na' beno' ga bdawgak bia yix̱e' ka' ḻeba', bia ka' zej zoaba' ḻo yo biž.

¹⁵Beno' ga golj nis bej ka', na' nis yegw ka'. Besbižo' yegw ẕen ka'.

¹⁶Chio' Le' nak ḻawe' ža, na' ḻezka' chio' nak yele. Le' bnnito'o byo', na' wbíž gan zej zoan.

¹⁷Bnnitkzo' to chi'ize yógo'te da' zej že' yežlyó nga. Le' beno' byo' wbá ka', na' byo' zag ka'.

¹⁸Bejsá' ḻaže' da' ni: benne' ka' bi ẕḻé'egekle' Le' chawe' ben dítjgekle' Le', X̱anto' Dios, na' benne' yaḻ ḻaže' ka' wnnégake' che La la'y chio' Le'.

¹⁹Bi gaḻ ḻažo'o neto', benne' chio' ka', to chi'ize. Bi wká'n neto', benne' ka' nži'ikzlo', ḻo na'gak benne' ka' zej nake' ka bia snia ka'. Zoato' ḻáwgake' ka zej nak gogoldo' ka'.

²⁰Bejsá' ḻaže' diža' da' bénḻeno' neto', dan' gáte'teze nníta'gak benne' wen da' ẕinnj ka'. Ẕdágake' do ẕente yežlyó nga.

²¹Bi go'o latje yedoé'egekle benne' gax̱jw ḻaže' ka'. Benne' ka' ẕzáka'ḻe'egake', na' benne' ka' žiážjegekle' we ḻáwgake' La la'y chio' Le'.

²²Wzó ža', Dios. Ben kan wnnakzo' gono'. Bejsá' ḻaže' kan žongak benne' yaḻ ḻaže' ka', benne' ka' ẕká'ngake' ka'ze La la'y chio' tža tža.

²³Bi gaḻ ḻažo'o da' wnné zi'gak benne' wen da' ẕinnj ka' chio' Le'. Néntezle žo'osbé da' žongak benne' ka' ẕží'igake' chio' Le'.