SALMOS 74:11-21

¹¹¿Para tlen tihuejcahua para titechpalehuis? ¿Para tlen ax tijnextía mohueyi chicahualis huan titechpalehuía?

¹²Hasta tlen huejcajquiya Toteco Dios itztoc notlanahuatijca. Yajaya nechpalehuijtoc ipan ni tlaltepactli huan campa hueli campa niyajtoc.

¹³Ica mochicahualis tijxelo hueyi atl. Huan tiquintzontlamilti huejhueyi tlapiyalime tlen temajmatijque tlen itztoyaj ipan atl.

¹⁴Tijcuaxamani nopa hueyi tlapiyali tlen itoca Leviatán, huan inacayo tiquinmacac ma quicuaca nopa tecuanime tlen itztoyaj ipan huactoc tlali.

¹⁵Tijchijqui ma meya atl ipan huejhueyi ameltini, huan tijchihua para miyac atemitl ma quipiyaca atl. Nojquiya tiquinhuatzqui sequin atemitl tlen ax quema huactoyaj.

¹⁶Ta moaxca tonali huan yohuali. Ta tijchijchijqui metztli huan tonati.

¹⁷Ta tijyejyeco hasta canque tlamis tlaltepactli. Nojquiya ta tijchihua ma tlatotoniya huan ma tlaseseya.

¹⁸TOTECO, xiquita quejatza mitzmahuispolohuaj mocualancaitacahua, huan quejatza mitztlaijilhuíaj nopa tlacame tlen mohueyimatij.

¹⁹¡TOTECO, amo xinechtlahuelcahua! Xijmanahui mopaloma imaco nopa cuajtli. Quena, xiquinmanahui motlacajhua ininmaco nopa tlacame tlen itztoque queja tecuanime.

²⁰¡Xiquilnamiqui nopa tlajtol sencahuali tlen tijchijtoc tohuaya! Pampa ni tlali temitoc ica tzintlayohuilotl huan ica tlacame tlen mosisiníaj.

²¹Amo xijcahua para ajachica ma techmahuispoloca tojuanti tlen tijpanotoque miyac tlaohuijcayotl. Xiquinpalehui tlen teicneltzitzi huan ax tleno quipiyaj para huelis mitzpaquilismacase.