SALMOS 74:1-11

¹Toteco Dios, ¿para tlen techtlahuelcajtoc para nochipa? ¿Para tlen tlahuel ticualani ica tojuanti catli tiitztoque quen timopilborregojhua?

²Xiquelnamiqui para tojuanti timomasehualhua catli timocohui huejcajya quema titetequipanohuayayaj san tlapic. Quena, techtlapejpeni para techchihuas timoaxcahua. Nojquiya tijtlapejpeni nopa altepetl Jerusalén para tijchihuas quen elisquía mochaj ipan ni tlaltipactli.

³Xihuala xiquitaqui quen quitlamisosolojtoque nopa altepetl, huan xijtlachili quenicatza tocualancaitacahua quisosolojtoque motiopa.

⁴Nopona tzajtzique mocualancaitacahua ica paquilistli quema tlasosolojque. Teipa san techhuetzquilijque huan quinquetzque ininteteyohua para quinextise ya techtlantoyaj.

⁵Hualajque ica ininhachas huan huejhueyi martillos hasta nesiyaya quen cuajcuahuini tlatlajco cuatitlamitl.

⁶Huan ama ica ininteposhua quitlapanque huan quisosolojtoque nochi tlamantli catli ica tlayejyecchijtoyaj motiopa.

⁷Quena, motiopa quitlatijque, huan quimahuispolojque moixpa nopa catli quihuicayaya motoca, huan quitlahuisojque tlalchi.

⁸Huan quiijtojque ipan ininyolo: “Ma tijtlamisosoloca nochi catli onca ipan ni tlali.” Huan yajque campa hueli huan quitlatijque nochi israelita tiopame, campa timosentiliyayaj para timitzhueyichihuase, Toteco Dios.

⁹Ayacmo onca niyon se tlamantli catli quinextía para timomasehualhua. Ayacmo onca tlajtol pannextiani. Ayacmo aqui huelis techilhuis hasta quema tlamis nochi ya ni.

¹⁰Toteco Dios, ¿hasta quema tlamis mitzmahuispolohuaj mocualancaitacahua? ¿Atlac amo quema tiquintlatzacuiltis?

¹¹¿Para tlen tihuejcahua para techpalehuis? ¿Para tlen amo tijnextía mohueyi chicahualis huan techpalehuía?