SALMOS 73:4-24

⁴Itztoque cuali ipan nochi ininemilis, huan amo mococohuaj.

⁵Amo quinajsi taohuijcayot yon tequipacholi, quej sequinoc quipiyaj.

⁶Yeca quema mohueyimatij, quiitaj para cuajcualtzi quej se costi cati tachijchihuali ica piltetzitzi cati pajpatiyo. Huan quema quichihuaj cati amo cuali, quiitaj quej iniyoyo cati cuajcualtzi.

⁷Nopa taixpanoca masehualme ya quijquisa iniixteyol pampa tahuel motomajtoque, huan ya quipixtoque nochi cati iniyolo quinequi.

⁸Inijuanti san quihuetzquilíaj Toteco huan quintemajmajtíaj imasehualhua. Mohueyimatij quema camanaltij.

⁹Fiero quitaijilhuíaj Toteco Dios cati itztoc ipan ilhuicacti. Huan quintelchihuaj cati itztoque ipan ni taltipacti.

¹⁰Yeca Toteco Dios quinhualicas sempa nochi imasehualhua ipan ni inialtepe, huan quipiyase miyac at nochi inijuanti.

¹¹Huan quiijtose: “¿Anmoilhuíaj Toteco quimatis taya onca? ¿Anmoilhuíaj Yaya Cati Más Hueyi quichihuilía cuenta cati pano nica?”

¹²Xiquitaca, ni masehualme cati amo teno quineltocaj amo teno ininpati. Quipiyaj se cuajcualtzi nemilisti huan talojtzitzi quimiyaquilíaj más inintomi.

¹³¡Amo teno nechpalehuía para nijpiya noyolo tapajpacti, huan san tapic nimocuatotonía para amo nijchihuas tajtacoli!

¹⁴Pampa nochi se tonali nechtatzacuiltíaj huan nechtaijyohuiltíaj sese ijnaloc.

¹⁵Sinta nicamanaltitosquía quej inijuanti, huajca niquincajcayajtosquía nochi momasehualhua.

¹⁶Quema nijnejqui nijmatis para ten itztoque cuali nopa masehualme cati quicualancaitaj Toteco, elqui tahuel ohui para nijmachilis.

¹⁷Pero se tonali nicalajqui ipan motiopa, Toteco Dios, para nimoyolilhuis ten nopa tamanti, huan huajca nijmachili taya quinchiya.

¹⁸Tiquintalijtoc ipan se ojti cati tahuel alaxtic. Quema tiquincuatopehuas, huajca nimantzi huetzise ipan se hueyi ostot huan nopona tzontamise.

¹⁹Quena, ica se talojtzi tamis nochi ininpaquilis. Huan itztose ipan majmajti para nochipa.

²⁰¡Nochi ininemilis eltoc quej se temicti! Quena, quej quema se cochtoc huan isatiquisa, Toteco, quej nopa quema timotananas huan tiquinhuejcamajcahuas.

²¹Quema niquitac ya ni, nelía tahuel nicualanqui huan hasta nechcocohuayaya noyolo.

²²Pampa niquitac para tahuel nihuihuitic nieltoya. ¡Hasta ninesiyaya moixpa quej se nitapiyali cati amo quipiya italnamiquilis!

²³Pero masque ya ni nopantic, nochipa niitztoc mohuaya ta, Toteco, huan techitzquitoc ipan nomanejmat.

²⁴Huan nijmati para motamachtil quisenhuiquilis nechyacanas ipan nochi nonemilis. Huan teipa, quema nimiquis, techselis nepa mochaj campa tacuajcualtzi.