Salmos 73:15-25

¹⁵Itaru, nuwsha anumashee chinarangeezi. Anumashee tsiyataranginaareena ashiru, Apanllee tiptsir tayutaritaranginaaparina.

¹⁶Nuw nda tsiyatarangtaati, itaru mangishi chinaranguri, ¿Tamari yashingchich kis taakana? táranguri, yasamaam zandaranguri, xapoorangina.

¹⁷Minush zari shiyash pangish, Apaa, pshturanguri, shiysha mangeetsi mangoonamaam p'tseerangsha.

¹⁸Yashingchich kurikpaneew sambarchimunpaz ashirusin naakanaya. Yuwash nda chinarana anush, shiysha Apaa, tununukpaz ashkachush wazawush pantsachinllinaya.

¹⁹Ayamtaati nda kis taachinllinaya. Napuxtayarusin, sitatstee táchapsinaya.

²⁰Taárashee tputs pamazukpaz ashku musásiri pastachinllinaya.

²¹Apaa, nuw nduma mangoonchuri, mangishi kapung tsiyantarangina. Nuw wanipa yutarit chinarangi.

²²Mangshari ashirangina. Nda mangoonarangina. Manginshuch ashiruri, nda mangoonkuri tárangina.

²³Itaru Apaa, yutarit chinarangitaati, shiysha kuwiptish nuwaa mbam patsisakush, nda kasaksha.

²⁴Shiyash itsinsaru tachitamaam nuwaa mangi p'tseeksha, Shiyash kuskachuri, shiysha nuwaa mangish ksaptari, Naani, táchsha.

²⁵Kanindap shiyangzimari nuw kusamaam zandkina. Nuw shiyapa ipuneeruri taakuri, ¿mayangazeeja nuw nish tsapurunasush tamarachee?