Salmos 73:1-27

¹Asaf we-namaked narmaksad. Ibibayobi, Bab-Dummad Israel-dulemargi nued-binsae, ibibayob dule-gwage-swilidikmaladgi nueddae.

²An iche-napinad isguednaganad, an iche-napinad nue-dummad-noenad.

³Dule-san-dummarba-imakmaladgi an nobguded, we-dule-isganamar nasgumai an dakargua, an egi nobguded.

⁴We-dulemar gwen boni nikasurmalad, na san-swilidik gudidimalad.

⁵Dulemar-ibmarbina-sogeyob ibmarbina-sogdisurmalad, dule-baigan-wiledimaladyob, wiledisurmalad.

⁶We-dulemar, e-san-dummarba-imaked, wingwa-dukargi-naiyob ise-daklegaled. E-sabsur-dule-imaked, mor-yoeyobi ise-oyogar damalad.

⁷Ibmar-isgana-ulubgi-sediid ise-oyogar damalad, ibmar-isgana-imaked bakar-buud oyomalad.

⁸Dulemar-baigangi sunnasur sunmakdamalad. Gadi dule-baigangi dododamalad. Na san-dummarba-imakmaladba aimar-ibgwensur imakmalad.

⁹E-sunmakedgi Bab-Dummadgi isdar sunmakdamalad, e-sunmakedba bela dulemar eba selediid.

¹⁰A-ulale, dulemar ese idaknaddamalad, ega ibmar-soged bela nabiridbiiye binsadamalad.

¹¹We-dule-isganamar sogdedamalad: ¿Ar wede, Bab-Dummad wisguosi? ¿Ar wede, Bab-Dummad-Bur-Birigined mag-itogosi?

¹²We-dule-isganamar dogdar-alamaknai dasurmalad, degite, baisursunna mani-ibedga guddamalad.

¹³Binsarsunna, an gwage-swilidik gudiid, binsarsunna, an ibmar-nued imakdiid.

¹⁴Ar emide, sabsur-an-imakdigumalad, wakudaryalaba an-sarsoardamalad.

¹⁵An weyob sogsana: “We-dule-isganamaryob an sunmakoye.” An be-mimmigangi aibichanad.

¹⁶An we-ibmarmala magar-itobi gusanad, suli-suli-itogega an-imaksad, aku an itogusad.

¹⁷Bab-Dummadse-goled-negse an dogsagua, geb an magar-itosad, igi-dule-isganamar bergumaloe.

¹⁸Bab-Dummad, be we-dulemar bonimar-abargi ogwichisad, we-dulemar na san-berguedse nadapmalad.

¹⁹¡Wemar ukiagwar bergudmaloed! Wemar dobedba bergudmaloed.

²⁰Bab-Jehová, bedi, igi dule e-gabdaksad napiragwadsulidba baisursunna daknonidae, deyobi, be gwisgualile, we-dule-isganamar-baisursunna dakoed, be we-dulemar-obelogoed.

²¹Bab-Dummad, suli-suli an itodigua, an-ulubgi nue-sae an itodii gusad.

²²Ar an ibmar-wissulidbali, gannar-gannar an imaksad, ibmar-durganyob an gusad.

²³Degi-inigwele, an begi bangussulid, bee be nue-an-nidii gusad.

²⁴Be anga binsaed-ukedba an nanadiid. We-napneg-bergusale, ise-nuedgi be an-abingaoed.

²⁵¿Ar doa nibneggi an-edarbemaisunna? Unnila bebi an-edarbemaid. Ar an beba gudiile, we-napneggi ibmar-baid an abesulid.

²⁶An-gangued bar nika an itosulid, degi-inigwele, Bab-Dummad, be an-ganguedid. Beginbi gudigu an sadeguoed.

²⁷Dulemar-begi-banguddamaladdi bese berguoed. Dule-be-sogedba-nanadisurmaladdi bese burgwemaloed.