Salmos 72:13-20

¹³Kuraksha waanaatsi tiptsir chinampatari tuwizpurtachiya. Pukireetstam tputs taárasheetstam tapachindachiya.

¹⁴Tputs Kurakaa tiptsiri kiyung yachamaam zandkitaatssin, uwsha tiptsiree tapachindachiya, watam kapung chinakuwa.

¹⁵Urutari kurak kasiru taachiya. Sambashuch tputs orootsee kurakaam panachinllinaya. Kurakaam Apanllee urutamari mashkusin taachinllinpa. Sheeru, Apanll urutamari istaku taachiya.

¹⁶Ashkachu, wanus zapan iyash tsapuni taachiya. Machpitam wanus zapantam tatsumim paratungachiya. Libanush tsap tamapari ashiru wanusi tsapurunasush izuuru tatsitchiya. Chirichir tamaparee ashiru izapanichiya.

¹⁷Tputs urutamari kurakaa sur yasachinllinpa. Urutamari zar tamapari ashiru kurakaa taachpa. Ashkachu, ztaru tputs kissha taachinllinaya. Wamachtashee wanasirimshi uru payuchinllinaya. Tsapurunasshuch tputs ichingurusin kurakaa ungirtaksin, Shiyamari kasirush taaksha, táchinllinaya.

¹⁸Apanll Taarashipani iyamari Israelchichini Apanllirini taakiya. Wamari kasiru wanasircha. Waamari iyaa kizpur istakiya.

¹⁹Shiysha Apaa, urutamari Taarashipanish taaksha. Shiyamari wanasirtishcha. Shiyamari tapachindampantishcha. Apaa, tputs ztaru shiyaa wanasirimshireetsish yasachinllinpa, atina. Ashiri Apaa, Wappari.

²⁰Anumari apap Dapiyarini mangush chinarangu, shiyapat tsiyatku tárangitamta.