Salmos 71:2-20

²Gúcale̱ neda', ne bselá neda' nen dute̱ da naca xrlátaje chiu'. Bze̱ naga chi'a, ne bselá neda'.

³Nacu' ca tu xiaj xre naga sua' chawe', na' waca xida' naga zu' te zra chizrela. Gunná be'enu' nu guselá neda', lawe' da nacu' Lue' ca tu xiaj xre naga dxaca dipa lazra'.

⁴Dios chia', bselá neda' lu na' benne' ca' zaj nabéaj xíchaje̱' Lue', ne lu na' benne' ca' dxelune̱' da cale̱la ne zaj naque̱' xichaj zra'a,

⁵lawe' da dxebeza lazra' Lue', Xrana' Dios. Nacu' Bénnea' dxuxúe̱' neda' gate nácatea' bídau'te̱.

⁶Lue' núxruquezu' neda' gate gúlajtea'. Lue' be̱nu' bdxuaja' lu le̱'e̱ xrna'a. ¡Tu güe lá'anazqueza' Lue'!

⁷Belexebane benne' zante̱ ca naca chia', ne ca naca chiu', dxuxúe xánniu' neda'.

⁸Be̱n tu gul-lazqueza' da güe lá'ana' Lue', ne gucá'ana szrena' Lue' du zra.

⁹Quebe guzú' neda' chalá'ala gate ba guxrúa'. Gate ba bedú lazra', quebe gusanu' neda'.

¹⁰Benne' dxeledábague̱' neda' dxelenné̱' chia', na' benne' ca' dxelezá lazre̱' xelútie̱' neda' belune̱' tuze dizra',

¹¹dxelenné̱': “Ba bsan Dios le̱'. Chéajdxu cheajté̱ladxu le̱' lawe' da québedxa nu zua nu guselá le̱'.”

¹²¡Dios, quebe su' zitu' naga zua'! ¡Dios chia', gudázega gácale̱nu' neda'!

¹³¡Be̱n xelexedué'ene̱'! “Be̱n xelexenite benne' ca' dxeledábague̱' neda'.” “Be̱n xelezúa xel-la' stu', ne xeleque zréaje benne' ca' dxelezá lazre̱' xelune̱' chia' da cale̱la.”

¹⁴Neda' tu cueza lázrezqueza' Lue', ne tu güe lá'anazqueza' Lue'.

¹⁵Guzenda' bénneache nacu' xrlátaje, ne tu guzénzquezda' le̱' ca da be̱nu' bseláu' neda', láqueze quebe nezda' bal-la lasa bseláu' neda'.

¹⁶Tu guchálajzqueza' chee̱ da zrente̱ da be̱nu' Lue', Xrana' Dios, ne gusá'a lazre' bénneache chee̱ da xrlátaje cheé̱quezu'.

¹⁷Dios, Lue' bsé̱denu' neda' gate nácatea' bidau'te̱. Dxulé'eda' bénneache ca naca da zrente̱ da be̱nu'.

¹⁸Dios, quebe gusán lazru' neda' gate bache guxrúa', ne ba bgucha'. Be̱' neda' lataj guzenda' zri'ine zre sua' ca naca xel-la' waca chiu', ne guzenda' bi za xelalaj ca naca xel-la' wal-la chiu',

¹⁹ne ca naca da xrlátaje chiu', da naca na da zrente̱, Dios. Lue' ba be̱nu' da zaj nácale̱'e̱ na zrente̱. Dios, ¿Núzraqueze ca Lue'?

²⁰Lue' be̱nu' gudéa' lu da ste̱be zante̱, ne lu da cale̱la ca', na' gunu' xexaca bana', na' da xula xechisu' neda' lu xe̱dxu ba.