SALMOS 71:2-20

²¡Techmanahui tlen nocualancaitacahua, pampa ta tixitlahuac! ¡Techchololti ininmaco! Ximohuijtzoma quentzi para techtlacaquilis huan techmaquixti.

³Nochipa san nimotlatijtoc huan nimotemachijtoc ipan ta para amo nechajsise nocualancaitacahua. Nijmati para ta titlanahuatijtoc ma nechmaquixtica pampa san ipan ta huelis nimomanahuis.

⁴NoTeco Dios, techmanahui ininmaco ni mosisinijca tlacame huan temictiani.

⁵TOTECO, ta catli titoTeco, san ipan ta nimotlatzquilijtoc, huan san ipan ta nimotemachijtoc hasta tlen quema niconetzi. Huan quej nopa nitelpocatixqui.

⁶Ta nochipa tiitztoc nohuaya hasta quema noja niitztoya iijtico nonana. Quena, tlen iijtico nonana ta techquixti huan nochipa techpalehuijtoc. ¡Yeca tlahuel nijnequi nimitzpaquilismacas para nochipa!

⁷Miyac san nechsentlachilíaj pampa quiitaj quenicatza techmocuitlahuía.

⁸Semilhuitl nimitzpaquilismacas huan nimitzhueyimatis por nochi catli techchihuilijtoc.

⁹Amo techtlahuelcahua ama quema ya nihuehuentzi huan ayacmo nijpiya fuerza.

¹⁰Pampa nocualancaitacahua nechejelnamiquij, huan san sejco mosentilijque ininhuaya sequinoc catli quinequij nechmictise.

¹¹Huan quiijtohuaj: “¡Ma tijtepotztocaca para tiquitzquise pampa iDios ya quitlahuelcajtoc, huan amo aqui huelis quimanahuis!”

¹²¡Toteco Dios, amo ximohuejcachihua tlen na! ¡NoTeco, xihuala nimantzi techpalehuiqui!

¹³Xiquinpinahualti huan xiquintzontlamilti nopa nocualancaitacahua catli quinequij nechchihuilise catli fiero. Quena, ma ayacmo quimatica tlaque quichihuase.

¹⁴Pero na más nimotemachis mopan ta para techpalehuis. Huan noja más nimitzpaquilismacas.

¹⁵Nochi masehualme niquinilhuis para san ta ticuali huan niquinpohuilis quenicatza techmanahuijtoc, huan techmocuitlahuijtoc mojmostla. Amo hueli nijpohuas quesqui huelta techmanahuijtoc ica catli amo cuali pampa tlahuel miyac.

¹⁶Nochi tonali ninejnemi ica nopa chicahualistli catli techmaca, TOTECO, ta catli tinoDios. Huan nochi masehualme niquinilhuía para san ta tixitlahuac huan ticuali.

¹⁷¡Toteco Dios, ta techpalehuijtoc hasta quema noja nieliyaya niconetzi! Hasta ama noja niquinpohuilijtinemi sequinoc tlen nopa huejhueyi tlamantli catli tijchijtoc.

¹⁸¡Toteco Dios, ama quema ya nihuehuentzi huan nitzonchipahuac, amo techtlahuelcahua! Noja techmaca nemilistli para niquinpohuilis tlen mohueyi chicahualis ni masehualme catli itztoque ama huan catli teipa tlacatise.

¹⁹Toteco Dios, mochicahualis huan catli xitlahuac tijchihua onajsi hasta ilhuicac. Ta tijchijtoc huejhueyi tlamantli. Amo onca seyoc Dios quen ta.

²⁰Ta techcahuilijtoc ma nijpano huejhueyi tlaohuijcayotl huan tequipacholi. Pero nijmati para teipa, sempa techtlananas tlen campa nopa ostotl, huan tijchihuas ma nimoyolcui. Huan sempa nijpiyas nemilistli.