SALMOS 71:2-19

²¡Xinechmanahui tlen nocualancaitacahua, pampa ta tixitlahuac! ¡Xinechmalacani ininmaco! Ximopacho quentzi para tinechtlacaquilis huan xinechmaquixti.

³Nochipa san nimotlatijtoc huan nimotemachijtoc ipan ta para ax nechajsise nocualancaitacahua. Nijmati para ta titlanahuatijtoc ma nechmaquixtica pampa san ipan ta huelis nimomanahuis.

⁴NoTeco Dios, xinechmanahui ininmaco ni mosisinijca tlacame huan temictiani.

⁵TOTECO, ta tlen titoTeco, san ipan ta nimotlatzquilijtoc, huan san ipan ta nimotemachijtoc hasta tlen quema niconetzi. Huan queja nopa nitelpocatixqui.

⁶Ta nochipa tiitztoc nohuaya hasta quema noja niitztoya iijtico nonana. Quena, tlen iijtico nonana ta tinechquixti huan nochipa tinechpalehuijtoc. ¡Yeca tlahuel nijnequi nimitzpaquilismacas para nochipa!

⁷Miyac san nechsentlachilíaj pampa quiitaj quejatza tinechmocuitlahuía.

⁸Semilhuitl nimitzpaquilismacas huan nimitzhueyimatis ipampa nochi tlen tinechchihuilijtoc.

⁹Amo xinechtlahuelcahua ama quema ya nihuehuentzi huan ayoc nijpiya fuerza.

¹⁰Pampa nocualancaitacahua nechijilnamiquij, huan san sejco mosentilijque ininhuaya sequinoc tlen quinequij nechmictise.

¹¹Huan quiijtohuaj: “¡Ma tijtepotztocaca para tiquitzquise pampa iDios ya quitlahuelcajtoc, huan axaca huelis quimanahuis!”

¹²¡Toteco Dios, amo ximohuejcatlali tlen na! ¡NoTeco, xihuala nimantzi xinechpalehuiqui!

¹³Xiquinpinahualti huan xiquintzontlamilti nopa nocualancaitacahua tlen quinequij nechchihuilise tlen fiero. Quena, ma ayoc quimatica tlachque quichihuase.

¹⁴Pero na más nimotemachis mopan ta para tinechpalehuis. Huan noja más nimitzpaquilismacas.

¹⁵Nochi tlacame niquinilhuis para san ta ticuali huan niquinpohuilis quejatza tinechmanahuijtoc, huan tinechmocuitlahuijtoc mojmostla. Ax hueli nijpohuas quesqui huelta tinechmanahuijtoc ica tlen ax cuali pampa tlahuel miyac.

¹⁶Nochi tonali ninejnemi ica nopa chicahualistli tlen tinechmaca, TOTECO, ta tlen tinoDios. Huan nochi tlacame niquinilhuía para san ta tixitlahuac huan ticuali.

¹⁷¡Toteco Dios, ta tinechpalehuijtoc hasta quema noja nieliyaya niconetzi! Hasta ama noja niquinpohuilijtinemi sequinoc tlen nopa huejhueyi tlamantli tlen tijchijtoc.

¹⁸¡Toteco Dios, ama quema ya nihuehuentzi huan nicuaichyojqui, amo xinechtlahuelcahua! Noja xinechmaca yolistli para niquinpohuilis tlen mohueyi chicahualis ni tlacame tlen itztoque ama huan tlen teipa tlacatise.

¹⁹Toteco Dios, mochicahualis huan tlen xitlahuac tijchihua onajsi hasta elhuicac. Ta tijchijtoc huejhueyi tlamantli. Ax onca seyoc Dios queja ta.