SALMOS 71:11-20

¹¹Huan quiijtohuaj: “¡Ma tijtepotztocaca para tiquitzquise pampa iDios ya quitahuelcajtoc, huan amo aqui huelis quimanahuis!”

¹²¡Toteco Dios, amo ximohuejcachihua ten na! ¡NoTeco, xihuala nimantzi techpalehuiqui!

¹³Xiquinpinahualti huan xiquintzontamilti nopa nocualancaitacahua cati quinequij nechchihuilise cati fiero. Quena, ma ayecmo quimatica taya quichihuase.

¹⁴Pero na más nimotemachis ipan ta para techpalehuis. Huan noja más nimitzpaquilismacas.

¹⁵Nochi masehualme niquinilhuis para san ta ticuali huan niquinpohuilis quenicatza techmanahuijtoc, huan techmocuitahuijtoc mojmosta. Amo hueli nijpohuas quesqui huelta techmanahuijtoc ica cati amo cuali pampa tahuel miyac.

¹⁶Nochi tonali ninejnemi ica nopa chicahualisti cati techmaca, TOTECO, ta cati tinoDios. Huan nochi masehualme niquinilhuía para san ta tixitahuac huan ticuali.

¹⁷¡Toteco Dios, ta techpalehuijtoc hasta quema noja nieliyaya niconetzi! Hasta ama noja niquinpohuilijtinemi sequinoc ten nopa huejhueyi tamanti cati tijchijtoc.

¹⁸¡Toteco Dios, ama quema ya nihuehuentzi huan nitzonchipahuac, amo techtahuelcahua! Noja techmaca nemilisti para niquinpohuilis ten mohueyi chicahualis ni masehualme cati itztoque ama huan cati teipa tacatise.

¹⁹Toteco Dios, mochicahualis huan cati xitahuac tijchihua onajsi hasta ilhuicac. Ta tijchijtoc huejhueyi tamanti. Amo onca seyoc Dios quej ta.

²⁰Ta techcahuilijtoc ma nijpano huejhueyi taohuijcayot huan tequipacholi. Pero nijmati para teipa, sempa techtananas ten campa nopa ostot, huan tijchihuas ma nimoyolcui. Huan sempa nijpiyas nemilisti.