SALMOS 69:6-34

⁶TOTECO, ta tiDios Cati Tijpiya Nochi Chicahualisti, amo xiquincahuili ma huetzica ipan tajtacoli por na notajtacol, nopa masehualme cati motemachíaj ipan ta. Ta cati titoTeco tiisraelitame, amo xiquincahuili ma pinahuaca sequinoc israelitame ica cati nijchijtoc na.

⁷Pampa nimitzicnelía, niquijyohuijtoc pinahualisti, huan nechhuetzquilijtoque hasta amo nijmatqui taya nijchihuas.

⁸Hasta noicnihua nechchihuaj quej amo nechixmatij huan nechitaj, quej elisquía niehua ipan niseyoc altepet.

⁹Quena, niquicnelía motiopa ica nochi noyolo hasta nimotemaca nimiquis por ya. Huan cati mitztaijilhuíaj ta, nojquiya nechtaijilhuíaj na pampa nimitztequipanohua.

¹⁰¡Quena, tahuel nechhuetzquilíaj huan nechpinajtíaj, quema nichoca huan nimosahua iixpa Toteco!

¹¹¡Tahuel fiero camanaltij ten na quema nimoquentía yoyomit cati sosoltic para nijnextis nimotequipachohua por notajtacolhua!

¹²Nopa tayacanca tequichihuani cati mosehuíaj campa icalte nopa altepet, noca motahuetzquiltíaj. Huan nopa ihuintini noca huicatinemij.

¹³Pero TOTECO na nijsenhuiquilía nimitztemohua huan nimotatajtía ipan ta, pampa nijmati ajsis tonali para techtacaquilis. Toteco Dios, ica mohueyi taicnelilis technanquili, pampa ta nochipa techicnelijtoc. Huajca technanquili quema nimotatajtía huan techmanahui.

¹⁴Techquixti ten ni soquit cati huejcata campa nimasitoc. Amo techcahuili para niatzonpolihuis. Techmanahui inimaco cati nechcualancaitaj. Techquixti ten ni hueyi at cati nechyahualojtoc.

¹⁵Amo xijcahuili ma nechtaijyohuilti ni hueyat, yon amo xijcahuili nopa at ma nechtolo. Techmanahui para amo nimasis ipan nopa ostot cati tahuel huejcata.

¹⁶TOTECO, technanquili quema nimitztzajtzilía pampa ta nelía ticuali. Ta techicnelía miyac huan tijpiya hueyi moyolo ica na.

¹⁷¡Amo ximotati quema nimitztemohua pampa tahuel nitaijyohuía! Ximoisihuilti, xihuala huan techmaquixtiqui.

¹⁸Xihuala, noTeco Dios huan techmanahuiqui. Techmaquixti inimaco nocualancaitacahua.

¹⁹Ta tijmati quenicatza camanaltij fiero ten na huan quenicatza nechpinahualtijtoque. Quichijtoque para ayecmo aqui ma nechtepanita. Ta tiquinixmati nochi nocualancaitacahua huan tijmati taya quiijtojtoque sese inijuanti.

²⁰Inijuanti tahuel nechyolcocojtoque huan nechtequipacholmacatoque. Nijtemojtoc ajquiya nechtasojtasquía huan nechyoltalisquía, pero yon se amo nijpanti.

²¹Quema nimayanayaya nechmacaque pajti cati temictía para ma nijcua. Huan quema niamiquiyaya nechmacaque ma niqui vinagre.

²²Nopa paquilisti cati inijuanti quipiyaj ma mocuepa tequipacholi. Huan nopa tasehuilisti cati quipiyaj ica inihuampoyohua, ma mocuepa cualancayot.

²³Ma huala ininpani tzintayohuilot huan ma huihuipicaca, ma ayecmo quipiyaca más fuerza. Ma elica popoyotzitzi huan ma tami nochi ininchicahualis.

²⁴Xiquinnextili mohueyi cualancayo huan xiquintzontamilti.

²⁵Inintequicalhua ma mocahua sosoltic, huan ipan ininchajchaj ma tatzitzicato. Ayecmo aqui ma itzto.

²⁶Pampa inijuanti más quitaijyohuiltíaj cati ta tijcocojtoc, huan quipinajtíaj cati ta tijtequipacholmacatoc.

²⁷Xiquijcuilo nochi inintajtacolhua huan amo xiquintapojpolhui.

²⁸¡Xiquixpolo inintoca ipan moama campa eltoc inintoca inijuanti cati yoltoque! ¡Ma amo quipiyaca tasehuilisti quej quipiyaj nopa masehualme cati itztoque xitahuaque moixpa!

²⁹Pero na cati nitaijyohuía huan niteicneltzi, techmaquixti huan techtanana. Quena, Toteco Dios, techtali campa ta tiquitas quinamiqui.

³⁰Huan huajca nihuicas huan nijpaquilismacas Toteco Dios. Quena, nijhueyimatis huan nijtascamatis.

³¹Huan TOTECO achi más quipactis ya nopa, huan amo quej sinta nijmacasquía se toro o se becerro cati tacuacuajhuía huan quipiya iistihua.

³²Inijuanti cati teicneltzitzi quiitase Toteco Dios quema quinmacas itapalehuil, huan yeca tahuel paquise. Huan nochi cati quitemohuaj Toteco Dios itztose ica paquilisti.

³³Pampa TOTECO quintacaquilía cati teicneltzitzi, huan amo quintahuelcahua inijuanti cati itztoque ipan tatzacti.

³⁴¡Xijpaquilismacaca TOTECO nochi amojuanti cati anitztoque ipan ilhuicacti huan taltipacti! ¡Ma quihueyichihuaca nochi cati itztoque ipan hueyi at!