Salmos 69:4-34

⁴Tputs zapan msangarusin, nuwaa natsakanaya. Mucheetsich kasiru tputs nuwaa zapan natsakanaya. Mangutari nuwaa tayutaritkanaya. Maacheetsi shuchitarpazi ashiru, nuwaa taxiyrsin; Tuwanpunda, átangat ashkanaya.

⁵Itaru Apaa, shiy nuwaa yasaktishcha. Nuw yutarit ashiranginaareena, anoo shiy izuuru yasaksha. ¿Tamayareezi yutaritshishireetsi pishuchi?

⁶Apaa, shiyamaricha kizpurish. Iy shiyaa Israelchichini Apanllirtanicha. Iyashuch zapan shiyamun mang' tatkanaya. Ashiriya, tputsirish nuwamand yutaritshishiri pazirusinapa. Kundarari nuwamand tputsireetsish tpazarusinapa, átana.

⁷Shiyaa kapung chinaki, anumand tputs nuwaa yutari tsiyatkanaya. Nuwaa tpazakanaya. Kizpur pazirsa.

⁸Zuwanlli tunar tamapari ashirusin nuwaa niyrkanaya.

⁹Itaru nuwsha, pangimandaritish wamin tsiyanis nuwaa kasichiya. Tputs shiyaa tpazamaam zandkusin, nuwaatssha tpazaktamsinaya.

¹⁰Nuw mangi kapung mantsakuri, tanukuri, mishat mangukuri, nuwaa yutarit tsiyatkanaya.

¹¹Mangi mantsakuri, kamari kuchar kamartakuri, nuwaa paksin, ichingarusin stakanaya.

¹²Tputs yaktaa washitungash shaniyeersin, nuwaa tsiyatstangat ashkusin taakanaya. Karusamapantaatssin nuwaa tayutaritkusin yaseekanaya.

¹³Itaru Apaa, nuw shiyaa kapung tsiyatkina. Ashiri yuwash shaana zandkachish, anush istangandama. Shiy kapung chinampantishcha. Nuwaa kapung chinaksha. Ashiri tapachindangandama.

¹⁴Nuwaa imurish yangamaam ksarishpa. Tputs zapan nuwaa natsakanaya. Itaru, shiysha nuwaa tapachindangandama.

¹⁵Mureenush nuwaa ksarinllpa. Nda nuwaa mureen pumaam izuuru istanda.

¹⁶Apaa, shiy nuwaa istangandama. Shiy wanasiri chinaksha. Shiy kchinamishtishcha. Ashiri nuwaa nayanikush, wanasiri napangandama.

¹⁷Apaa, shiy watam nuwaa tputsirshawa. Ashiri Apaa, nuwaa mapiyrinllpa. Tputs pacharundama, átana. Ashiri mikeerush nuwaa istanganda.

¹⁸Nuwanung kayumayarush, nuwaa tapachindanda. Kundarareetsi arap zanganingcha.

¹⁹¿Waninll nuwaa natsakanawa? Nuwaa tpazakanaya. Mangutari nuwaa mantsir tsiyatkanaya. Shiy anoo ichinguru yasaksha. Nuwaa kundarari paksha.

²⁰Nuwaa uru yutarit tsiyatkusin, kapung natsaksin, mangi kapung mantsakina. Mangi mantsakuri wizpuriri ndunareekina. Nuwaa mangeetsi tuwizpurtapanda, atitaati, itaru tputs nda minumtiyam nuwaa istamaam zandaranganaya.

²¹Nuwaamsha katungtsee tspaspa íseersin panakanaya. Kapung sachitaranguri, kapizsha nuwaam panakanaya.

²²Ashiri, Apaa, uwsha shiyaam katungamaam shaniykusin, shiysha waneengcha.

²³Wach mchus tamapari ashiru mangu masaru taachinllinpa. Uru kiyung kachiychinllpa. Urutamari puniksin, wanumb nungtachinllinpa.

²⁴Shiy kapung tsiyantayarush, waneengcha. Tsiyanish zambazarinllpa. Izuuru waneengcha. Pakchiyam nayanirinllpa.

²⁵Mishat, kundarareetsi pang' kapeeteerush ksangcha. Anush minumtiyam taarusinapa.

²⁶Shiy nuwaa kiyung yacharangish, anoo kasiranasha uwshtisin nuwaa kiyung yachakanaya. Nuwaa stakanaya.

²⁷Ashiri shiysha Apaa, aranginasha waneengcha. Nayanirinllpa. Izuuru waneeyarush ksangcha.

²⁸Kirakarishish yuwash shaanaa tputsirish sur yandam taaru, anush kundarareetsi sur izuuru tchingangcha. Watam nda urutamari shiyapat taachinllinawa. Ashiri tputsiriptish sur washunand kundarareetsi sur yandarinllpa.

²⁹Apaa, Nuw kapung kiyung kachiykina. Istanda. Nuwaa tuwizpurtanda. Tapachindanda.

³⁰Ashkachush, nuwsha shiyaa ungirtakuri, yaseesshish yasichima. Mangipti itsinsaru shiyaa ungirtachima, atina.

³¹Ashiriya, chiy tputsich chinuzee toro pachayaruch, nduntaati ashiru karupanaa witspatari, wachizuppatari muchkachuch, anoo Apanll kispari napchiya. Itaru, chiy tputsich mangiptartich itsinsaru Apanllee ungirtakuch, Apanllsha aranginasha chiyaa kis napkiya.

³²Anoo Apanll pakchu, mang' ksaku, chiyaatssha mangeemich ksashish wayachiya. Apanllingaz támarakuch, tuwizpurtachiya.

³³Watam tputs kiyung kachiyku, Apanllee istapanda átu, mashku, Apanllsha uru mazinakuwa. Tputs tumanamaw taakana, anootstam nda niyrkiya.

³⁴Ashiri kanindshuchis, mishat tsapurunasshuchis, mishat marshuchis, ichingarus, Apanllee ungirtangtsa, nuw siyaa atina.