SALMOS 69:4-33

⁴Tlahuel miyaqui nopa masehualme catli nechcualancaitaj masque amo tleno niquinchihuilijtoc. Nelía quipiyaj miyac chicahualistli nocualancaitacahua catli quinequij nechmictise. Pero na amo niquinixpanotoc. Quinequij nechtlatzacuiltise ica se tlamantli catli amo nijchijtoc.

⁵NoTeco Dios, ta tijmati para nelía nihuihuitic, huan tiquiximati nochi notlajtlacolhua.

⁶TOTECO, ta tiDios Catli Tijpiya Nochi Chicahualistli, amo xiquincahuili ma huetzica ipan tlajtlacoli por na notlajtlacol, nopa masehualme catli motemachíaj ipan ta. Ta catli titoTeco tiisraelitame, amo xiquincahuili ma mopinahuaca sequinoc israelitame ica catli nijchijtoc na.

⁷Pampa nimitzicnelía, niquijiyohuijtoc pinahualistli, huan nechhuetzquilijtoque hasta amo nijmatqui tlaque nijchihuasquía.

⁸Hasta noicnihua nechchihuaj quen amo nechiximatij huan nechitaj, quen se niseyoc altepetl ejquetl.

⁹Quena, niquicnelía motiopa ica nochi noyolo masque ica ya nopa monequi nimiquis. Huan catli mitztlaijilhuíaj ta, nojquiya nechtlaijilhuíaj na pampa nimitztequipanohua.

¹⁰¡Quena, tlahuel nechhuetzquilíaj huan nechpinajtíaj, quema nichoca huan nimosahua iixpa Toteco!

¹¹¡Tlahuel fiero camanaltij tlen na quema nimoquentía yoyomitl catli sosoltic para nijnextis nimotequipachohua por notlajtlacolhua!

¹²Nopa tlayacanca tequitini catli mosehuíaj ipuertajteno altepetl, noca motlahuetzquiltíaj. Huan nopa ihuintini noca huicatinemij.

¹³Pero TOTECO na nijsenhuiquilía nimitztemohua huan nimotlatlajtía ipan ta, pampa nijmati ajsis tonali para techtlacaquilis. Toteco Dios, ica mohueyi tlaicnelilis technanquili, pampa ta nochipa techicnelijtoc. Huajca technanquili quema nimotlatlajtía huan techmanahui.

¹⁴Techquixti tlen ni soquitl catli huejcatla campa nimasitoc. Amo techcahuili para niatzonpolihuis. Techmanahui ininmaco catli nechcualancaitaj. Techquixti tlen ni hueyi atl catli nechyahualojtoc.

¹⁵Amo xijcahuili ma nechtlaijiyohuilti ni miyac atl catli ajsitoc, niyon amo xijcahuili nopa atl ma nechtolo. Techmanahui para amo nimasis ipan nopa ostotl catli tlahuel huejcatla.

¹⁶TOTECO, technanquili quema nimitztzajtzilía pampa ta nelía ticuali. Ta techicnelía miyac huan tijpiya hueyi moyolo ica na.

¹⁷¡Amo ximotlati quema nimitztemohua pampa tlahuel nitlaijiyohuía! Ximoisihuilti, xihuala huan techmaquixtiqui.

¹⁸Xihuala, noTeco Dios huan techmanahuiqui. Techmaquixti ininmaco nocualancaitacahua.

¹⁹Ta tijmati quenicatza camanaltij fiero tlen na huan quenicatza nechpinahualtijtoque. Quichijtoque para ayacmo aqui ma nechtlepanita. Ta tiquiniximati nochi nocualancaitacahua huan tijmati tlaque quiijtojtoque sesen inijuanti.

²⁰Inijuanti tlahuel nechyolcocojtoque huan nechtequipacholmacatoque. Nijtemojtoc ajqueya nechtlasojtlasquía huan nechyoltlalisquía, pero niyon se amo nijpanti.

²¹Quema nimayanayaya nechmacaque pajtli catli temictía para notlacualis. Huan quema niamiquiyaya nechmacaque ma niquiji vinagre.

²²Nopa paquilistli catli inijuanti quipiyaj ma mocuepa tequipacholi. Huan nopa tlasehuilistli catli quipiyaj ica ininhuampoyohua, ma mocuepa cualancayotl.

²³Ma huala ininpani tzintlayohuilotl huan ma huihuipicaca pampa ayacmo quipiyase más fuerza. Ma elica popoyotzitzi huan ma tlami nochi ininchicahualis.

²⁴Xiquinnextili mohueyi cualancayo huan xiquintzontlamilti.

²⁵Ipan inintequicalhua ma mocahua tlasosoltic, huan ipan ininchajchaj ma tlatzitzicato. Ayacmo aqui ma itzto.

²⁶Pampa inijuanti más quitlaijiyohuiltíaj catli ta tijcocojtoc, huan quipinajtíaj catli ta tijtequipacholmacatoc.

²⁷Xiquijcuilo nochi inintlajtlacolhua huan amo xiquintlapojpolhui.

²⁸¡Xiquixpolo inintoca ipan moama campa eltoc inintoca inijuanti catli yoltoque! ¡Ma amo quipiyaca tlasehuilistli quen quipiyaj nopa masehualme catli itztoque xitlahuaque moixpa!

²⁹Pero na catli nitlaijiyohuía huan niteicneltzi, techmaquixti huan techtlanana. Quena, Toteco Dios, techtlali campa ta tiquitas quinamiqui.

³⁰Huan huajca nihuicas huan nijpaquilismacas Toteco Dios. Quena, nijhueyimatis huan nijtlascamatis.

³¹Huan TOTECO achi más quipactis ya nopa, huan amo quen sintla nijmacasquía se toro o se becerro catli tlacuacuajhuía huan quipiya iistihua.

³²Inijuanti catli teicneltzitzi quiitase Toteco Dios quema quinmacas itlapalehuil, huan yeca tlahuel paquise. Huan nochi catli quitemohuaj Toteco Dios itztose ica paquilistli.

³³Pampa TOTECO quintlacaquilía catli teicneltzitzi, huan amo quintlahuelcahua inijuanti catli itztoque ipan tlatzactli.