Salmos 69:4-25

⁴Ba naxándxa benne' dxelecuídene̱' neda' ca naxán xicha xíchaja', ne quebe bi de̱ bi nuna'. Zaj naca benne' wál-lale̱'e̱ benne' dxeledábague̱' neda', benne' ca' dxuluzría xi'e̱ neda', ne quebe bi de̱ bizr chee̱ na'. ¿Dxal-la' quízruja' da quebe gulana'?

⁵Dios, nézqueznu' Lue' naca da xálaze da nuna', ne dxelé'equeznu' dul-la da be̱na'.

⁶Quebe gu'u lataj xelexedué'e ne̱ chia' neda' benne' ca' dxuluxrén lazre̱' Lue', Xrana' Dios szrente̱. Quebe gu'u lataj xeleque zréaje ne̱ chia' neda' benne' ca' dxelebeza lazre̱' Lue', Dios chee̱ benne' Israel ca'.

⁷Lawe' da nazrí'ida' Lue' bulucháchale̱ne̱' neda', na' lu xel-la' stu' zúaqueza'.

⁸Ca tu benne' zitu' naca' lau bi bícha'dau' ca', ne quebe zaj núnbea bi chee̱ xrna'a neda'.

⁹Lawe' da dxé'le̱'a gunne xue chee̱ lizru' dxal-la na lu lázrdawa'. Gate dxelenné̱' benne' ca' schanni' chiu' Lue', Dios, naca ca dxelenné̱' schanni' chia' neda'.

¹⁰Gudxezra', ne be̱na' gubasa, na' bde cuina' xel-la' zi', na' chee̱ le̱ na' bulucháchale̱ne̱' neda'.

¹¹Cá'anqueze bgacu cuina' zra lana' tuzruj. Buluzúe̱' neda' ca tu da dxulé'e na da baxache' zrente̱.

¹²Gulenné̱ chia' benne' ca' zaj xu'e̱ xu'u lawe', na' benne' ca' dxelezuzre̱' belún le̱' chia' lu da belul-le̱'.

¹³Neda' bláwizra' Lue', Xrana' Dios, lu zra dxezaca ba lazru' Lue'. Dios, lu xel-la' dxexache lazre' zren chiu', ne lawe' da líqueze nacu' weselá chee̱ntu', bene chia'.

¹⁴Bebéaj neda' lu da ste̱be zua', naca' ca tu benne' xu'e̱ lu guzra' situj, ne quebe gu'u lataj cházedxa'. Bselá neda' lu na' benne' ca' dxelecuídene̱' neda'. Naca' ca tu benne' xu'e̱ lu nisa situj.

¹⁵Quebe gu'u lataj gatia' ca tu benne' xegache̱' lu nisa situj, ne quebe gaca' ca tu benne' chu'e̱ lu da situj, ne quebe gaca' ca tu benne' cheajchazie̱' tu lu xe̱dxu situj.

¹⁶Beche̱be chia', Xrana' Dios, lawe' da chawe' naca xel-la' dxexache lazre' chiu'. Gudá, gúcale̱ neda', lawe' da zrente̱ naca xel-la' dxexache lazre' chiu'.

¹⁷Gunná' xque ca da dxaca chia' neda', we̱n zrin chiu'. lawe' da zua' lu da sté̱bele̱'e̱, be̱n ba xuzre xennu' chia'.

¹⁸Gudá naga zua', ne bselá neda'. Bselá neda' lawe' da zaj naxánle̱'e̱ benne' ca' dxeledábague̱' neda'.

¹⁹Lue' nézqueznu' ca dxulucháchale̱ne̱' neda', ne ca zua' lu da sté̱bele̱'e̱, ne ca dxulucá'ana dítaje̱' neda'. Dxelé'equeznu' xúgute̱ benne' ca' dxelecuídene̱' neda'.

²⁰Lawe' da dxelún le̱' chia' dxedú lazra', ne zua' lu da ste̱be. Guleza' nu benne' xexache lazre̱' neda', san quebe nu chilá'. Guleza' nu benne' xelexúe zrene̱' neda', san quebe nu chilá'.

²¹Bulugawe̱' neda' da sla', na' gate gubíleda', buluxí'aje̱' neda' da zichaj.

²²Ca naca laní chee̱ benne' ca' be̱n gaca na ca tu xralaj naga cheajlecházie̱', ne be̱n xexaca da ba neza chee̱' tu da gun na cheajlecházie̱'.

²³Be̱n xelechul-la xiaj lawe̱' chee̱ québedxa xelelé'ene̱', ne be̱n tu xelexrízrezqueze benne' ca'.

²⁴Dute̱ xel-la' dxezrá'a chiu' ble'e benne' ca', ne dute̱ xel-la' xichaj zra'a chiu' be̱' benne' ca'.

²⁵Be̱n quebe nu chilá' lu xu'u lizre benne' ca', ne quebe nu sua lu xe̱zr la xu chee̱',