Salmos 69:19-29

¹⁹Lue' nézqueznu' ca dxulucháchale̱ne̱' neda', ne ca zua' lu da sté̱bele̱'e̱, ne ca dxulucá'ana dítaje̱' neda'. Dxelé'equeznu' xúgute̱ benne' ca' dxelecuídene̱' neda'.

²⁰Lawe' da dxelún le̱' chia' dxedú lazra', ne zua' lu da ste̱be. Guleza' nu benne' xexache lazre̱' neda', san quebe nu chilá'. Guleza' nu benne' xelexúe zrene̱' neda', san quebe nu chilá'.

²¹Bulugawe̱' neda' da sla', na' gate gubíleda', buluxí'aje̱' neda' da zichaj.

²²Ca naca laní chee̱ benne' ca' be̱n gaca na ca tu xralaj naga cheajlecházie̱', ne be̱n xexaca da ba neza chee̱' tu da gun na cheajlecházie̱'.

²³Be̱n xelechul-la xiaj lawe̱' chee̱ québedxa xelelé'ene̱', ne be̱n tu xelexrízrezqueze benne' ca'.

²⁴Dute̱ xel-la' dxezrá'a chiu' ble'e benne' ca', ne dute̱ xel-la' xichaj zra'a chiu' be̱' benne' ca'.

²⁵Be̱n quebe nu chilá' lu xu'u lizre benne' ca', ne quebe nu sua lu xe̱zr la xu chee̱',

²⁶lawe' da guláu zi' xuzre̱' bénnea' be̱nu' Lue' we̱', ne dxuluzrizre̱' ca naca xel-la' zi' dxedé bénnea' be̱'u Lue'.

²⁷Ble'e dul-la da zaj nabaga benne' ca', ne quebe gu'u le̱' lataj xelaque̱' tuze benne' xrlátaje chiu'.

²⁸Busula la benne' ca' lu xiche chee̱ benne' ca' zaj nape̱' xel-la' nabán, ne quebe guzúaju' le̱' naga zaj naxúaj la benne' xrlátaje ca'.

²⁹Neda' zua' lu da ba xa', ne lu da sté̱bele̱'e̱. Bselá neda', Dios, ne bechisa neda'.