SALMOS 69:13-29

¹³Pero TOTECO na nijsenhuiquilía nimitztemohua huan nimomaijtohua ipan ta, pampa nijmati ajsis tonali para tinechtlacaquilis. Toteco Dios, ica mohueyi teicnelilis xinechnanquili, pampa ta nochipa tinechicnelijtoc. Huajca xinechnanquili quema nimomaijtohua huan xinechmanahui.

¹⁴Xinechquixti tlen ni soquitl tlen huejcatla campa nimasitoc. Amo xinechcahuili para niatzonpolihuis. Xinechmanahui ininmaco tlen nechcocolíaj. Xinechquixti tlen ni hueyi atl tlen nechyahualojtoc.

¹⁵Amo xijcahuili ma nechtlaijiyohuilti ni tlahuelatl, niyon amo xijcahuili nopa atl ma nechtolo. Xinechmanahui para ax nimasis ipan nopa tlalostotl tlen tlahuel huejcatla.

¹⁶TOTECO, xinechnanquili quema nimitztzajtzilía pampa ta nelía ticuali. Ta tinechicnelía miyac huan tijpiya hueyi moyolo ica na.

¹⁷¡Amo ximotlati quema nimitztemohua pampa tlahuel nitlaijiyohuía! Ximoisihuilti, xihuala huan xinechmaquixtiqui.

¹⁸Xihuala, noTeco Dios huan xinechmanahuiqui. Xinechmaquixti ininmaco nocualancaitacahua.

¹⁹Ta tijmati quejatza camatij fiero tlen na huan quejatza nechpinahualtijtoque. Quichijtoque para ayoc aca ma nechtlepanita. Ta tiquinixmati nochi nocualancaitacahua huan tijmati tlachque quiijtojtoque sesen inijuanti.

²⁰Inijuanti tlahuel nechyolcocojtoque huan nechcuesolmacatoque. Nijtemojtoc tlen nechtlasojtlasquía huan nechyoltlalisquía, pero niyon se ax nijpanti.

²¹Quema nimayanayaya nechmacaque pajtli tlen temictía para notlacualis. Huan quema niamiquiyaya nechmacaque ma niqui vinagre.

²²Nopa paquilistli tlen inijuanti quipiyaj ma mocuepa ica cuesoli. Huan nopa tlasehuilistli tlen quipiyaj ica ininhuampoyohua, ma mocuepa ica cualantli.

²³Ma huala ininpani tzintlayohuilotl huan ma huihuipicaca pampa ayoc quipiyase más fuerza. Ma elica popoyotzitzi huan ma tlami nochi ininchicahualis.

²⁴Xiquinnextili mohueyi cualancayo huan xiquintzontlamilti.

²⁵Ipan inintequicalhua ma mocahua tlaxolejtoc, huan ipan ininchajchaj ma tlatzitzicato. Ayoc aca ma itzto.

²⁶Pampa inijuanti más quitlaijiyohuiltíaj tlen ta tijcocojtoc, huan quipinajtíaj tlen ta tijcuesolmacatoc.

²⁷Xiquijcuilo nochi inintlajtlacolhua huan amo xiquintlapojpolhui.

²⁸¡Xiquixpolo inintoca ipan moama campa eltoc inintoca inijuanti tlen yoltoque! ¡Ma ax quipiyaca tlasehuilistli queja quipiyaj nopa tlacame tlen itztoque xitlahuaque moixpa!

²⁹Pero na tlen nitlaijiyohuía huan niteicneltzi, xinechmaquixti huan xinechtlalana. Quena, Toteco Dios, xinechtlali campa ta tiquitas quinamiqui.