Salmos 69:11-35

¹¹Bukib-itoged-mola an yosale, angi dodoardamalad.

¹²Dulemar neggwebur-doged-yawagakgi-bukudamaladi, angi sunmakedibidamalad. Mummugana angi namakedibidamalad.

¹³Bab-Jehová, andi an bese goledi, be-itolegedba be an-abin-imakdaed. Sabed-dummarba-be-nikadba be an-abinsadaed. Be sunna an-abonogedba be an-bendaked. Bab-Dummadye, ¡emiskwaa be an-bendake!

¹⁴Olli-mata-dummadgi be an-onoge. Melle olli-matagi-doged be an-imake. Dule-isdar-an-dakmaladgi be an-onoge, dii-wilasailadgi be an-onoge.

¹⁵Melle diiba-seleged be an-imake, melle biryaba-bipirmakega be an-sae, melle napa angi mured be imake.

¹⁶Bab-Jehová, be an-abin-imake, ar bedi dule-nuedid, be-sabgued dummarba be nikad. Be bela-bela dule-wiledakmaidba, gannar be anse dage.

¹⁷Bab-Dummad, be-mai-idu melle be dukue, be an-abin-imake, ar an boni-abargi naid.

¹⁸Bab-Dummadye an-walikaa be dage, be an-bendakdage. ¡An-isdarmaladgi be an-onoge!

¹⁹Bab-Dummad, nue be wisid dulemar angi yoledimalad, dulemar an-obingegsadimalad, dulemar angi dododimalad. Bab-Dummad, bela be wisid, doamar an-isdarmalad gumala.

²⁰Dule-angi-dododimalad nue-nunmak an-imaksamalad. Emide geg an barsagusad, an bendakleged sated. Dule-wile-an-daked an amidiinad, gwen an amissurgusad. Dule-wile-an-dakmalad satemalad.

²¹An-masgi ina-nusu obatismalad. An uku-uku-itonaigua, ina-gagbid anga uksamalad.

²²E-iba-onobukwadgi, e-masi egi-aibinega be imake. E-nasgumaidi, egi-aibinega be imake.

²³Melle-atakmalaga, amar-e-ibya mommoo be imake. Nolloo namalaga, e-gangued ei be sue.

²⁴Be-urwed egi gwichigued be imake. Be-urwed amargi yoleged be imake.

²⁵E-negmar ollo-ollo-siged be sae. Amargi dulemar megsuli be imake.

²⁶Ar be dule-naibi-imaksad balegichamalad, ar be dule-naibi-imaksad-e-nunmakedgi dododmalad.

²⁷Wemar ibmar-isgana-imaksadyob be imakmoga. We-dulemar melle be wiledako.

²⁸We-dulemar garda-burba-duladgi-e-nug-narmakar-naid be elie. Melle dulemar-nueganba e-nug-narmakar be meso.

²⁹Bab-Dummad, ar andi an uellediid, an nunmak-itodiid, be an-ogwiche, be an-bendake.

³⁰Bab-Dummad, namakedgi an be-nug ogannogoed, dog-nuedye-sogedgi be-nug an odummogoed.

³¹We-ibmar-uklegedi, Bab-Jehováʼga moli-bebe-nikad-ukedba, moli-sapingwagwad-bebe-nikad-ukedba, Bab-Jehová bur-yeer itodaed.

³²Dule-wilegana weyob-dakdagogua, nue-yeer itodmaloed, Bab-Dummad-amidimalad-e-gwage gannaledmaloed.

³³Ar Bab-Jehová dule-wilegana-ese-goledi itodaed. E-dulemar-galebukwad mesagwar daksulid.

³⁴Nibnega, napnega, muu-billigan, bela-agi-ibmar-bukmalad, Bab-Dummad-nug odummosun.

³⁵Ar Bab-Dummad Sión-yala bendakoed, Judá-neggweburmar gannar soboed. Agine na e-dulemar degisadegu ambikuega imakoed.