SALMOS 68:23-32

²³Niquinhualicas pampa monequi nochi inquintzontlamiltise. Inieso quixolonise imoicxihua huan imochichihua quipipitzose.”

²⁴NoTeco Dios, tinotlanahuatijca, niquinita miyac tlacame mitztoquilíaj para yase ipan motiopa.

²⁵Inijuanti tlen huicaj tlayacantiyohuij. Tlatlajco yohuij nopa ichpocame tlen quitzilinijtiyohuij panderos. Tlatepotzco yohuij tlen tlatzotzonaj.

²⁶Huan quej ni huicaj: “Nochi inisraelitame, xijhueyimatica Toteco Dios. Xijpaquilismacaca Toteco tlen techmacatoc yolistli nochi tojuanti.”

²⁷Tlayacantiyohuij iixhuihua Benjamín. Huan tlatepotzco hualahuij nopa tlayacanani huan huehue tlacame tlen iixhuihua Judá, huan nopa tlayacanani tlen iixhuihua Zabulón huan Neftalí.

²⁸Toteco Dios, ica mohueyi chicahualis xijchihua nochi tlen titechilhuijtoc. Quena, xijnexti mohueyi chicahualis para sequinoc ma quiitaca nopa huejhueyi tlamantli tlen ta titechchihuilijtoc.

²⁹Nopa tlanahuatiani tlen nochi tlaltini quihualicaj iniofrendas ipan motiopa tlen eltoc ipan altepetl Jerusalén.

³⁰Toteco Dios, xiquinajhua tocualancaitacahua. Xiquinechcapantlali nopa tlacame tlen mosisiníaj queja torojme, huan xiquinchihua ma motemactilica ica ta. Ma mitzhualiquilica inintepos plata queja se ofrenda. Xiquinsemana nopa mosisinijca tlacame tlen tlahuel quinpactía tlatehuise.

³¹Nopa Egipto ehuani quinhualicase inintelpocahua huan nochi tlamantli ininteposhua tlen yejyectzitzi huan pajpatiyo. Huan nopa Etiopía ehuani momatlalanase moixpa para mitzhueyichihuase.

³²Nochi intlanahuatiani ipan nochi ni tlaltepactli, xijhuicatica Toteco Dios. Xihuicaca huan xijpaquilismacaca Toteco.