Salmos 66:3-18

³Bab-Dummadga sogmar: “¡Be-ibmar-imakedi, geger-dakleged! Be gandik-maisoggua, be-isdarmalad be-urbaligwa gudimalad.

⁴Bela-dule-we-napneggi-bukwad be-nug odummomaloed, bega namakmaloed, be-nuggi namakmaloed.”

⁵¡Dagmala! Bab-Dummad-ibmar-imaksad dakdamala. Anmarga-ibmar-gegerdaklemalad-imaksad be dakdamala.

⁶Bab-Dummad demar dinnaa imaksad, diwar dinnaa imaksabalid. Degidbali, dulemar neg-dinnagwadgi nabir-obaksamalad. Degisoggu, anmar Bab-Dummadgi wergumarsunna.

⁷Bab-Dummad gargandikidba degisadegu negsemaid, bela-dule-gudimaladgi nakulediid. Dulemar-eba-dasurmalad, gwen-abin gwisguosurmalad.

⁸Bela dulemar, Bab-Dummad-nug odummomarsun. Bab-Dummadga-namaklenaid, bela itomalaga imakmarsun.

⁹Ar Bab-Dummad anmar-san bendaksad, mer-galakuega anmar-imaksad.

¹⁰Bab-Dummad, bee be, anmar-wilubdaksad, mani-swilidik-imaklegeyob be anmar-imaksad,

¹¹sakigi-galegega be anmar-imaksad, nunmaked-dummad be anmargi ogwisnonikid.

¹²Dulemar anmar-nonogi-annaega be imaksad, soo-buleganba-ibitogega be anmar-imaksad, dii-buleganba-ibitogega be anmar-imaksad. Emisgindi be, neg-nuedse anmar-ogwisgunonikid.

¹³An bese-goled-negse ibmar-ogumakar-ukega an nonikoed, an bega ise-sogar ibmar-imakoye-sogsad-imakega an nonikoed.

¹⁴An bonigan-abalagi-gunaidgi, an bega ise-sogar ibmar-imakoye sogsa gusad.

¹⁵An bega ibmar-ogumakegala, we-ibdurgan-waladummagan ukoed: Sibad-wawaad-machergan, moli-bebe-nikad-machergan, sibad-machergan, an bega ukoed.

¹⁶Bab-Dummad-dobekwaa-gudimalad, ¡dagmala! ¡Itodamala! Bela Bab-Dummad-anga-ibmar-imaksad, an bemarga sogoed.

¹⁷Bela-belad gandikidbali Bab-Dummadse an gocha gusad, an e-nug-odummonai gusad.

¹⁸Ar an-gwagegi an isdar binsasana, Bab-Jehová an-itossulinad.