SALMOS 66:2-20

²¡Le goḻ ka nak yeḻa' ẕen chie' Ḻe'! ¡Le wká'n ẕene' kate' we ḻawle Ḻe'!

³Le ye' Dios: “¡Žebáneḻe'elto' che da' beno' ḻe'!” Ni'a che yeḻa' ẕen che yeḻa' wak chio' benne' ka' bi ẕḻé'egekle' Le' chawe' žóngake' ka ẕnna x̱tižo'o.

⁴Benne' ka' nníta'gake' dot yežlyó we ḻáwgake' Le', na' góḻgake' chio' Le', na' che La la'y chio'.

⁵Le da, ḻé'elele da' ẕen ka' da' ben Dios, da' ẕenḻe'e da' bene' ni'a chegak benne' chie' ka'.

⁶Bene' ga beyák nisdo' yo biž, na' wdegak benne' chie' ka' ḻen ní'agakze' gan wzóa to yegw zil. Žoa'a nisdon' bebéḻe'egekle' ḻaw Dios.

⁷Ḻen yeḻa' wak chie' nna bi'e to chi'ize. Ẕwíakze' da' žongak benne' ka' yógo'te yež ka'. Benne' ka' ẕží'igake' chie' Ḻe' bi gata' yeḻa' ẕen chégake'.

⁸Ḻe'e, benne' ka', le wká'n ẕen Dios chežo. Le wzenle benne' ka' da' žoe ḻawle Ḻe'.

⁹Ḻekze' žape chi'e žo'o nich soažo nbanžo, na' bi bi'e latje chejchégwžo.

¹⁰Le', Dios, bwio' neto' ḻo da' ka' bento'. Bdio' neto' ḻo da' wẕáka'to' kan žongak benne' ka' ẕdégake' ya plat ḻo yi' nich ga'nen chawe'.

¹¹Beno' ga bejchazto' to ḻo do yeḻj. Bdo'o x̱kóže'to' to ywa' zí'iḻe'e.

¹²Beno' ga wdegak benne' zej žie' bžina' chie' ka' ḻo yichjto'. Wdeto' da' naken ka to ḻo yi', na' to ḻo nis zil, na' bebejo' neto', na' bzo' neto' to latje gan zoato' ḻo yeḻa' ba nez.

¹³Cho'okza' ližo' nich wzeya' biado' ka' ḻawo' Le'. Gonna' chio' da' wchebe ḻaža'a gona'.

¹⁴Bchebe ḻaža'a gonan', dan' wnnía' katen' wžé' zédḻe'ela'.

¹⁵Wzeya' biado' ka', bia ženne' ka', ḻawo' Le', na' kwen žen chegak ẕíla'do' ka' wzeya'-ba' gan zo', na' gota' beždo' ka', na' chibo byo ka' ḻawo' Le'.

¹⁶Le da, yénlele, yógo'tele ḻe'e ẕžébele Dios. Wzenla' ḻe'e da' bene', gókḻene' neda'.

¹⁷Dot ḻaža'a bḻiža' Ḻe', na' bka'n ẕenkza' Ḻe'.

¹⁸Chela' wzé ḻaža'a to da' ẕinnj bi benle X̱anžon' chia',

¹⁹san da' likze benle Dios chi'a, na' bze nage' da' wnnabla' Le'.

²⁰Bi bzoe' cheḻa'ale da' bcháḻjḻena' Ḻe', san beyache' ḻáže'le' neda'. ¡Ga'n ẕen Dios!