SALMOS 66:14-18

¹⁴Pampa quema niitztoya ipan taohuijcayot, nimitztajtolcahuili ica nocamac, para nimitzmacas miyac tacajcahualisti.

¹⁵Yeca ama nimitzhualiquilía ni oquich borregojme, chivojme huan becerros cati tomahuaque. Huan ininpocyo tejcos hasta ajsis moixpa.

¹⁶Nochi amojuanti cati anquitepanitaj Toteco Dios huan anquiimacasij anquiixpanose, xihualaca xijtacaquiliquij, huan nimechpohuilis nochi cati yaya nechchihuilijtoc.

¹⁷Chicahuac na nijtzajtzili para ma nechpalehui, huan quema nijcamanalhuiyaya, nijhueyimatiyaya.

¹⁸Pero sinta na nijpiyasquía tajtacoli ipan noyolo, huajca amo nechtacaquilijtosquía.