SALMOS 66:11-19

¹¹Ta titechmasilti ipan momatla huan tijtlali tocuitlapa tlamamali tlen tlahuel etic.

¹²Tijchijqui ma nemica topani tlen ehuaj sequinoc tlaltini. Tipanoque ipan atl huan ipan tlitl. Pero ama tinechtiochijtoc huan tinechmacatoc nochi tlen cuali.

¹³Ama nihualajtoc ipan motiopa para nimitzmacas tlacajcahualistli tlatlatili. Huan queja nopa nijtlamichihuas tlen nimitztlajtolcahuilijtoc para nijchihuas.

¹⁴Pampa quema niitztoya ipan tlaohuijcayotl, nimitztlajtolcahuili ica nocamac, para nimitzmacas miyac tlacajcahualistli.

¹⁵Yeca ama nimitzhualiquilía ni oquich borregojme, chivojme huan becerrojme tlen tomahuaque. Huan ininpocyo tlejcos hasta ajsis moixpa.

¹⁶Nochi imojuanti tlen inquitlepanitaj Toteco Dios huan inquiimacasij inquiixpanose, xihualaca xijtlacaquiliquij, huan nimechpohuilis nochi tlen yajaya nechchihuilijtoc.

¹⁷Chicahuac na nijtzajtzili para ma nechpalehui, huan quema nijcamahuiyaya, nijhueyimatiyaya.

¹⁸Pero intla na ax niquilhuijtosquía Toteco notlajtlacolhua para ma nechtlapojpolhui, huajca ax nechtlacaquilijtosquía.

¹⁹Pero pampa niquilhui Toteco Dios ma nechtlapojpolhui, yajaya nechtlacaquili huan quichijqui tlen niquilhui.