SALMOS 63:4-11

⁴Huan nochi tonali quema noja niitztos, nimitztiochihuas. Huan moixpa nimomatlalanas huan nimomaijtos ica ta.

⁵Huan huajca, quena, nijmatis queja elisquía ya niixhuic ica se tlacualistli tlen ajhuiyac. Huan nimitzhueyimatis ica miyac paquilistli.

⁶Nochi yohuali quema nimoteca ipan notlapech huan ax hueli nicochi, nimoilhuía tlen ta. Quena, nimoyolilhuía tlen ta sesen hora.

⁷Nimoilhuía quejatza tinechpalehuijtoc huan yeca sesen yohuali tlahuel nipaqui. Queja se piyo quintlatía iconehua ieltlapaltzala, queja nopa ta tinechtlatía na para ax tleno nechajsis.

⁸Nimotlatzquilijtoc ipan ta pampa san ta tinechmocuitlahuía ica mohueyi chicahualis.

⁹Nochi tlen quinequij nechmictise yase mictla.

¹⁰Pampa ya eltoc tlasencahuali para miquise, huan para sequinoc quintzontlamiltise ica machete. Huan inintlacayohua elis tlacualistli para nopa tepechichime.

¹¹Pero na, nitlanahuatijquetl, nimopaquilismacas ipan ta, Toteco Dios. Huan nojquiya paquise nochi sequinoc tlen senquistoc motemachíaj ipan ta. Pero nochi tlen istlacatij, ta, Toteco, tiquincamatzacuas.